Spanjollja Gjenovefa Ruiz Kalavera, drejtorja për Ballkanin Perëndimor në Komisionin Europian, e cila është në krye të Operacionit Ndërkombëtar të Monitorimit të Vettingut, doli para mediave për të sqaruar gjithë procesin. Ajo, sikur ta kish dëgjuar kreun e LSI-së dy net më parë në Top Story, tha se ONM do të kryejë një monitorim të fuqishëm, por nuk merr vendime ekzekutive.
“ONM po kryen monitorim të fuqishëm por nuk merr vendime ekzekutive. Të gjitha vendimet përfundimtare në këtë proces do i takojnë autoriteteve shqiptare. Që nesër do të fillojë puna me ekspertë të kualifikuar që do të jenë vëzhgues ndërkombëtar afashkurtër që do të dërgohen për të monitoruar fazën e parë”, tha Ruiz Kalavera.
“Pasi faza e parë të jetë përfunduar fillon faza e dytë dhe KE me SHBA do të sjellë ekip afatgjatë vëzhguesit ndërkombëtar, specialistë dhe të nivelit të lartë që do të monitorojnë procesin e vettingut”, shtoi ajo më tej.
Duke folur përballë gazetarit Sokol Balla këtë të hënë, kreu i LSI-së Ilir Meta tha se vettingun do e bëjnë shqiptarët, deklarim me sfond politik ky, pasi siç dihet ai dhe forca e tij politike, kanë qenë gjithnjë kritike ndaj disa aspekteve të Reformës në Drejtësi, ku veçohet ai më i ndjeshmi, vettingu.
Sakaq, puna ONM-së nis plotësisht më 16 shkurt, kur, me të drejtën që u jep ligji, vëzhguesit ndërkombëtarë të shqyrtojnë listat e Avokatit të Popullit dhe ia paraqesin Kuvendit deri më 1 mars. Aty më pas nis seleksionimi për ata që duhet ose nuk duhet të jenë anëtarë të organeve të reja të vettingut. /tesheshi.com/
