Periudha e thatë që filloi në fund të vitit 2021 uli prodhimin e energjisë në hidrocentralet, dhe shkatërroi të korrat, gjë që rrezikoi si blegtorët, ashtu edhe ushqimin e kafshëve të tyre.
Një thatësirë e zgjatur në Portugalinë qendrore ka zbuluar rrënojat e një fshati që përfundoi nën ujë gati 70 vjet më pare. E njëjta ka goditur edhe Spanjën fqinje.
“Nuk e kam parë kurrë!” tha Carlos Perdigao, 76 vjeç, mbi pjesën tjetër të shtëpisë së gurtë në fshatin Vilar, e cila u përmbyt nga lumi Zezere pas hapjes së digës në vitin 1954.
Vilar ndodhet në brigjet e tij dhe sot është i rrethuar nga dheu i verdhë i plasaritur, i cili është një tjetër shenjë e thatësirës që po zgjat këtë në dimër, që ka goditur pra edhe Spanjën fqinje.
Shërbimet meteorologjike të dy vendeve njoftuan se ky vit ishte janari i dytë më i thatë që nga viti 2000.
Thatësira aktuale është e jashtëzakonshme për shkak të “intensitetit, shkallës dhe jetëgjatësisë së saj”, tha klimatologu Ricardo Deus nga shërbimi meteorologjik portugez IPMA.
Nga gjithsej 55 diga në Portugali, 24 ruajnë vetëm gjysmën e kapacitetit të tyre ujor dhe pesë janë në më pak se 20 për qind, tha Copernicus, programi i vëzhgimit të Tokës i Bashkimit Evropian.
Më i prekuri është Algarve, provinca më jugore e Portugalisë, një nga destinacionet kryesore turistike evropiane.
Nga ana tjetër, Spanja ka një të katërtën e sasisë së zakonshme të reshjeve në krahasim me vitet e tjera, sipas të dhënave të shërbimit meteorologjik AEMET.
Periudha e thatë që filloi në fund të vitit 2021 uli prodhimin e energjisë në hidrocentrale dhe shkatërroi të korrat, gjë që rrezikoi si blegtorët, ashtu edhe ushqimin e kafshëve të tyre.
Në fillim të këtij muaji, Portugalia urdhëroi pesë hidrocentrale të ndalonin përdorimin e ujit për të prodhuar energji elektrike për ta mbajtur atë në dispozicion të njerëzve.
Pothuajse 30 për qind e energjisë elektrike portugeze vjen nga digat.
Ministri spanjoll i Bujqësisë Luis Planas tha të martën se qeveria ishte “e shqetësuar” për thatësirën dhe do të vendoste “masa të nevojshme”, në varësi të zhvillimeve.
Rezervat ujore të Spanjës janë aktualisht në më pak se 45 për qind të kapacitetit, thanë zyrtarët. Më të prekurit janë Andaluzia jugore dhe provinca verilindore e Katalonjës.
Blegtorët në të dy vendet janë të shqetësuar.
“Bari që ne ushqejmë bagëtinë nuk rritet,” tha Antonio Estevao, një prodhues djathi me rreth 30 dhi në Portela de Fojo Machio, një fshat në Portugalinë qendrore pranë qytetit Pampilhose da Serre.
“Nëse nuk do të bjerë shi në ditët në vijim, do të jetë shumë e ndërlikuar”, tha ai duke parë kullotat e thata.
Ajo zonë u godit nga zjarre shkatërruese në vitin 2017 që morën më shumë se 100 jetë.
Thatësirat gjithnjë e më të shpeshta dhe intensive priten të ushtrojnë presion të madh në rajonet e cenueshme nga klima dhe të rrisin rrezikun e fatkeqësive natyrore si zjarret, thonë shkencëtarët.
Megjithëse ndryshimi i periudhave të lagështa dhe të thata është i zakonshëm në jug të Evropës, “ka pasur një rënie në përqindjen e viteve me shi”, tha Filipe Duarte Santos, një ekspert mjedisor në Universitetin e Lisbonës.
Këto thatësira janë “një nga pasojat më serioze të ndryshimeve klimatike”, shtoi ai.
Derisa emetime të gazeve serrë të reduktohen në mënyrë drastike, problemi do të vazhdojë.
Problemi nuk do të zgjidhet në javët në vijim pasi meteorologët vazhdojnë të parashikojnë reshje nën mesataren.
Përballë problemit, qeveria portugeze njoftoi të enjten se do të forcojë bashkëpunimin e saj me Spanjën në luftën kundër thatësirës. /tesheshi.com/
