Përmbytjet që shkatërruan Spanjën lindore këtë javë kanë vrarë 158 njerëz, thanë së fundi shërbimet e urgjencës spanjolle, ndërsa disa pjesë të shtetit iberik po përgatiteshin për shi të dendur pas stuhive të fuqishme.
Nga numri i përgjithshëm, 155 viktima u regjistruan vetëm në rajonin më të goditur të Valencias, raporton shërbimi i platformës X, me dy vdekje të tjera në rajonin fqinj Castilla-La Mancha dhe një në Andaluzi.
Në njoftimin për shtyp të shërbimit të urgjencës nuk specifikohet numri i personave që janë ende të zhdukur.
Përmbytjet më vdekjeprurëse në historinë moderne të Spanjës goditën rajonin lindor të Valencias pas shiut të rrëmbyeshëm të martën dhe të mërkurën. Rrugët dhe qytetet janë nën ujë e llucë.
Shërbimi meteorologjik AEMET lëshoi të enjten një paralajmërim për përmbytje në të gjithë provincën e Castellon.
“Stuhitë nuk kanë mbaruar ende,” paralajmëroi kryeministri spanjoll Pedro Sanchez gjatë një vizite në Valencia. Ai siguroi popullatën lokale për mbështetjen e qeverisë qendrore në Madrid.
Qeveria e Ishujve Balearik i ka bërë thirrje popullatës që të jetë jashtëzakonisht e kujdesshme në ditët në vijim, veçanërisht në ishujt e njohur të pushimeve – Majorka dhe Menorca. Një dritë paralajmëruese portokalli, e dyta më e fortë, është në fuqi atje.
E premtja është një festë publike në Spanjë, duke shënuar fillimin e fundjavës së gjatë, të cilën shumë spanjollë normalisht do ta përdornin për të udhëtuar. Por Sanchez u bëri thirrje banorëve në provincat e prekura të Valencias dhe Castellón të “qëndrojnë në shtëpi”.
Kryeministri tha se është e rëndësishme të merren parasysh paralajmërimet e autoriteteve dhe të zbatohen rekomandimet e tyre.
Papa Françesku shprehu të enjten “afërsinë e tij me popullin e Valencias” në “këtë kohë katastrofike” pasi Spanja u godit nga përmbytjet vdekjeprurëse.
“Unë lutem për ta”, tha ai në një video dërguar dioqezës spanjolle, në të cilën ai dha bekimin e tij. /tesheshi.com/
