Kryeministri spanjoll në detyrë, Mariano Rajoy, është takuar sot me udhëheqësin e Ciudadanos-it, partisë së qendrës, për arritjen e një marrëveshjeje.
Shpresat për t’i lënë pas tetë muajt e paralizës politike janë shtuar pasi Rajoy i pranoi kërkesat e Ciudadanos-it, duke pranuar gjithashtu që t’i nënshtrohet një mocioni besimi në parlament.
Albert Rivera, udhëheqësi i Ciudadanos-it, deklaroi pas takimit se Rajoy i kishte plotësuar kushtet për të siguruar mbështetjen e partisë së tij.
Vetë kryeministri në detyrë u shpreh se qe ndërmarrë një hap vendimtar, e se ekipet nga dy partitë do të nisnin negociatat të premten.
Partia Popullore e Rajoy-it i ka fituar si zgjedhjet e dhjetorit të vitit të shkuar, ashtu dhe ato të qershorit, por pa mundur të sigurojë një shumicë dërrmuese që do t’i jepte mundësi ta krijonte e vetme qeverinë.
Sidoqoftë, marrëveshja e sotme është vetëm hapi i parë, pasi ajo nuk e mundëson krijimin e menjëhershëm të qeverisë për shkak të numrave. Rajoy mund të formojë një qeveri pakice nëse socialistët e PSOE-së pranojnë të abstenojnë në votimin e dytë në parlament, që kryhet 48 orë pas votimit të parë. /tesheshi.com/
