Spanja “njeh” Kosovën: lejon simbolet e saj në garat atletike

Spanja, një vend që ende nuk e njeh Kosovën, ka ndërmarrë një akt “njohjeje” të saj duke lejuar që atletët nga Kosova të përdorin simbolet, flamuj dhe himnin e Kosovës në garat botërore që po zhvillohen në atë vend, sipas një deklarate të përbashkët të Komitetit Olimpik Ndërkombëtar dhe Komitetit Olimpik Kombëtar të Spanjës.

Siç thuhet në një deklaratë në faqen e internetit të IOC, ky vendim u garanton atletëve nga Kosova një konkurim nën të njëjtat kushte si atletët e tjerë nga 206 komitete olimpike kombëtare.

Spanja kohët e fundit nuk u lejoi karatistëve nga Kosova që të konkurronin me flamurin dhe himnin në Kampionatin Botëror në Madrid, por vetëm nën simbolet e Federatës Botërore të Karatesë.

Deri më sot, pavarësia e Kosovës është njohur nga 115 vende të botës.

Vendet që e kanë njohur pasaportën e Kosovës si një dokument udhëtimi të vlefshëm, edhe pse nuk e kanë njohur Kosovën si shtet të pavarur, janë Greqia, Rumania, Sllovakia, Bosnja dhe Hercegovina, Kina, Izraeli, Brazili dhe Rusia.

Në maj 2016, Kosova u bë anëtare e plotë e FIFA-s dhe UEFA-s, një ndër arritjet më të mëdha të saj në fushën e njohjes ndërkombëtare. /tesheshi.com/