Spanjollët do të dalin rishtas të votojnë më 26 qershor, pasi partitë kryesore politike dështuan në përpjekjen për t’i dhënë vendit një qeveri koalicioni.
Mbreti nënshkroi dekretin që shpërndan parlamentin, duke lajmëruar njëkohësisht dhe datën e zgjedhjeve të përgjithshme elektorale.
Partia e kryeministrit Mariano Rajoy doli fituese në zgjedhjet e 20 dhjetorit, por nuk arriti të marrë shumicën.
Kjo është hera e parë që zgjedhjet përsëriten në Spanjë që prej vdekjes së diktatorit Franco.
“Eshtë hera e parë që ndodh kjo në periudhën demokratike, sepse ne nuk qemë në gjendje të përmbushim mandatin që na dhanë qytetarët,” tha kryetari i parlamentit, Patxi Lopez, në një konferencë shtypi.
“Le të shpresojmë se e kemi marrë mësimin, e që në parlamentin e ardhshëm të arrihet një marrëveshje sa më shpejt të jetë e mundur,” ka shtuar ai.
Zgjedhjet e dhjetorit i dhanë fund sistemit dypartiak në Spanjë, ndërsa vendi nuk ka patur kurrë një qeveri koalicioni.
Problemet ekonomike janë të theksuara në ekonominë e katërt më të madhe në eurozonë. Një plagë sociale është papunësia, në shifrën 21 për qind. Një përqindje që është më e larta në BE pas asaj të Greqisë.
Anketimet e deritanishme nuk janë shpresëdhënëse, pasi sugjerojnë një tablo të ngjashme dhe pas zgjedhjeve të qershorit. /tesheshi.com/
