Përfaqësuesja spanjolle ka triumfuar në kampionatin e futbollit të sallës që është mbajtur në Serbi, ku në finale ka mposhtur Rusinë, (7-3).
Iberikët zhvilluan një ndeshje pothuajse të përkryer dhe në fund me plot meritë ngritën lartë trofeun e shtatë në histori. Dy futbollistët spanjoll, Miguelin dhe Rivillos, në fundin e kompeticionit kanë ndarë ”Këpucën e Artë”, pasi që ishin me numër të barabartë të golave.
Pesë gola në pjesën e parë kanë demoralizuar rusët, që në fraksionin e dytë kishin vendosur ta heqin gardianin nga porta për të futur një futbollist, mirëpo e kanë pësuar edhe më keq duke pësuar dy gola të tjerë, derisa kanë realizuar në fund tre golat e nderit, në një ndeshje që fundi tashmë dihej.
Kështu, përfaqësuesja e udhëhequr nga Venancio Lopez, triumfon me plot sukses në Beograd, duke ringritur edhe njëherë në piadestalin më të lartë futbollin spanjoll të sallës. /tesheshi.com/
