Me një trajner të ri në stol, spanjollët kanë lënë pas zhgënjimin e eliminimit në Europianin e Francës, për ta nisur me këmbë të mbarë fushatën kualifikuese për botërorin Rusi 2018.
Fatkeqët kanë qenë lojtarët e përfaqësueses së Lihtenshtajnit, që janë detyruar ta nxjerrin tetë herë topin nga porta e tyre. Spanja ka fituar 8-0 ndaj Lihtenshtajnit, në një ndeshje që ngjante më shumë me një të tillë përgatitore. Nga dy gola kanë shënuar Diego Costa, David Silva e Alvaro Morata, ndërkohë që kanë realizuar dhe Sergi Roberto eVitolo.
Në sfidën tjetër të grupit G, Italia ka fituar bindshëm ndaj Izraelit. Fitorja 1-3 për italianët në fushë kundërshtare është bërë e mundur falë golave të shënuar nga Pelle, Candreva dhe Immobile. Vendasit izraelitë janë përgjigjur vetëm me një gol të realizuar nga Ben Chaim, që ka qenë vërtet i bukur.
Takimi i tretë i këtij grupi, i ndërprerë për shkak të stuhisë, ai mes Shqipërisë dhe Maqedonisë, do të vijojë sot në orën 14:00.
Përballjet e para të grupit D kanë dhënë këto përfundime: Gjeorgji – Austri 1-2, Serbi – Irlandë 2-2, dhe Uells – Moldavi 4-0.
Interesant grupi I, ku ka patur tre barazime 1-1.
Kosova ka marrë pikën e parë në debutimin historik, duke barazuar në Finlandë.
Po 1-1 ka përfunduar dhe sfida Kroaci – Turqi, e luajtur pa tifozë për shkak të dënimit të dhënë për kroatët nga incidentet në ndeshjet e mëhershme. Turqia ka qenë me fat që ka marrë një pikë pas presionit të vazhdueshëm të vendasve. Fatih Terim ka zgjedhur të bëjë revolucion, duke lënë jashtë skuadrës emra të njohur, mes të cilëve yllin e Barcelonës, Arda Turan.
Ukrainë – Islandë ka patur të njëjtin fund: 1-1. Finnbogason do t’i kalonte islandezët në epërsi që në minutën e pestë, për të barazuar Yarmolenko në mbarim të pjesës së parë. /tesheshi.com/
