Kryeministri spanjoll Pedro Sanchez njoftoi se “viza e artë”, e cila është në fuqi në vend që nga viti 2013 dhe që lejon leje qëndrimi të përkohshme ose të përhershme për të huajt nëse blejnë një shtëpi apo investojnë në atë vend, do të hiqet.
Në një fjalim në një tubim në Sevilje, Sanchez njoftoi se vendimi për heqjen e “vizës së artë” do të merret në mbledhjen e rregullt javore të Këshillit të Ministrave, që do të mbahet më 9 prill.
Ai deklaroi se nesër Këshilli i Ministrave do të diskutojë raportin e përgatitur nga Ministria e Strehimit për heqjen e praktikës së nisur nga Partia Popullore e djathtë (PP), e cila ishte në pushtet në atë kohë në 2013.
Sacnhez nuk dha detaje të mëtejshme rreth këtij vendimi apo kur mund të hyjë në fuqi.
Sipas tij, ky program u ofron të pasurve “privilegje të maskuara” dhe e kthen Spanjën në “një lloj kolonie që shpesh tërheq para të pista”.
Ndërsa qeveria spanjolle synon të kontrollojë çmimet e banesave që rriten me shpejtësi në vend për shkak të ndikimit të “vizës së artë”, Sanchez tha: “Ne do të marrim masat e nevojshme për të siguruar që strehimi të jetë një e drejtë dhe jo një biznes spekulativ”.
Rreth 96 për qind e atyre që përdorin “vizën e artë” e kanë marrë atë duke blerë pasuri të paluajtshme në Spanjë. Në këtë prijnë qytetarët e Kinës, Rusisë, Iranit, SHBA-së dhe Venezuelës, raporton TRT. /tesheshi.com/
