Kryeministrja skoceze, Nicola Sturgeon, ka vizituar Brukselin në kuadër të bisedimeve me zyrtarë të lartë të BE-së për mbrojtjen e interesave të vendit të saj pas referendimit të javës së shkuar në Britani.
Ajo e ka lënë të hapur mundësinë e një referendumi të dytë në Skoci për pavarësinë, duke lënë të kuptohet dëshirën që skocezët të mbeten në BE pavarësisht largimit të Britanisë.
Por i pari që ka reaguar kundër ka qenë kryeministri në detyrë i Spanjës, Mariano Rajoy, i cili ka deklauar se Skocia nuk ka kompetencë për të negociuar me Bashkimin Europian.
“Spanja kundërshton çdo negociatë me çdokënd tjetër veç qeverisë së Mbretërisë së Bashkuar. Jam ekstremisht kundër kësaj, traktatet janë ekstremisht kundër kësaj, dhe unë besoj se gjithkush është ekstremisht kundër kësaj,” ka deklaruar Rajoy. “Nëse Mbretëria e Bashkuar largohet, Skocia largohet.”
Edhe pse më i butë në tonin e tij, presidenti i Francës, Francois Hollande, ka shprehur në thelb të njëjtën gjë, “Negociatat do të kryhen me Mbretërinë e Bashkuar, jo me një pjesë të saj.”
Skocia votoi në referendum për qëndrimin në BE, përkundër votës së përgjithshme britanike, që vendosi për daljen nga unioni.
“Nëse ka një rrugë që Skocia të qëndrojë (në BE), unë jam e vendosur të përpiqem dhe ta gjej atë rrugë,” do të shprehej Nicola Sturgeon. /tesheshi.com/
