SPAK prangos Gjushin e Durrësit

Vangjush Dako, ish-kryebashkiak i Durrësit në tre mandate, është “peshku i madh” i sapoarrestuar nga SPAK.

Njeriu që mban dhe vulën “non grata” nga amerikanët, akuzohet për shpërdorim detyre në rastin e një pallati.

Raportohet se ai është vetëdorëzuar në Policinë e Tiranës pas lëshimit të urrdhërarrestit.

Në një reagim të menjëhershëm nga Berati, aty ku po zhvillonte një takim “Falenderimi”, kryeministri Rama tha se “kemi hyrë në një fazë komplet të re, ku për herë të parë në historinë e popullit tonë po goditen njerëz të lidhur me pushtetin”.

“Natyrisht që kjo nuk është e lehtë, këtu ka edhe gjëra që të bëjnë të ndihesh jo mirë, qoftë për arsye se s’ke si ndihesh mirë kur shikon dikë që deri dje ka qenë krah teje, dhe pastaj është në krah avokatit dhe përballë prokurorit apo gjykatësit dhe me siguri diçka ka ndodhur.

Por edhe kur shikon sesi mund të përdoret forca  e pushtetit të drejtësisë për të bërë dhe gjëra që nuk shkojnë, të gjitha këto janë pjesë e një procesi, janë pjesë e një historie të re dhe rruga është e përpjetë nuk është dishezë në këtë drejtim. Por kini parasysh që për herë të parë po ndodh kjo në historinë e popullit tonë. Kurrë s’ka ndodhur më parë. Për këtë ne duhet të jemi krenarë për PS dhe gjithë kontributin që japim”, tha Rama.

Kujtojmë se Dako u angazhua dhe në fushatën e 14 majit, por Rama tha se ishte zgjedhje e tij personale. /tesheshi.com/