Kryesuesi i Kuvendit të Kosovës, Adem Mikullovci ka konfirmuar se sot në orën 11:00 do të vazhdojë seanca konstitutive e Kuvendit të Kosovës.
Thirrja e seancës është bërë pas kërkesës së PAN-it dhe AKR-së, të cilët pas një takimi maratonik që kanë mbajtur të mërkurën nga mëngjesi deri në orët e mbrëmjes me Listën Serbe, kanë kërkuar vazhdimin e seancës për sot.
“I nderuari kryesues Mikullovci,
Duke shprehur konsideratat tona më të larta për ju si deputeti më i vjetër dhe njëkohësisht kryesues i Kuvendit të Kosovës, dëshirojmë t´ju informojmë:
Në emër të koalicionit PAN, AKR-së dhe komuniteteve të tjera joshumicë të përfaqësuara në Kuvendin e Kosovës, është krijuar shumica parlamentare për konstituimin e Kuvendit dhe institucioneve të tjera.
Ndaj, kërkojmë nga ju që me (07.09.2017) duke filluar nga ora 10 të thërrisni vazhdimin e seancës konstituive”, thuhet në letrën e nënshkruar nga Kadri Veseli dhe Behgjet Pacolli.
Kuvendi për disa herë ka dështuar që të zgjedh organet drejtuese të tij, ndërsa pritet që sot të zgjidhet kryetari dhe nënkryetari pas marrëveshjes që PAN ka arritur me AKR-në. /tesheshi.com/
