Enigma e zgjedhjeve presidenciale në Francë do të marrë fund në orët e mbrëmjes të së dielës, kur dhe do të mësohet se cili prej kandidatëve ka për t’i zënë vendin presidentit Francois Hollande, në ikje e sipër.
Zgjedhje që priten me ankth në tërë Bashkimin Europian, për vetë fatin e tij, në do të shkohet drejt një rishtrëngimi të radhëve apo drejt një Frexit-i.
Qytetarët francezë bëjnë sot zgjedhjen e tyre në një balotazh të çuditshëm, ku mungojnë dy krahët kryesorë politikë, kandidatët e të cilëve janë shpërfillur në raundin e parë të zgjedhjeve, të parë si jo të denjë për ta udhëhequr vendin.
Më të paparashikueshmet në dekada, më të rëndësishmet në dekada, këto zgjedhje, balotazhi i sotëm, kanë vënë karshi dy njerëz me pikëpamje krejt të kundërta. Emmanuel Macron është një mbështetës i BE-së, krejt ndryshe ngjet me Marine Le Pen-in.
Centristi zotohet për forcim të bashkëpunimit me BE-në, ekstremistja Le Pen zotohet për të hequr dorë nga euroja e për të mbajtur një referendum për qëndrimin apo daljen nga unioni europian.
Një ish-bankier dhe një ish-ministër ekonomie në qeverinë socialiste, Macron akuzohet se mbron interesat e sektorit financiar e se është dora e fshehur e presidentit Holande; në anën tjetër, Marine Le Pen, një ecëse në rrugën e të atit të saj, ka ditur të përfitojë nga rritja e pakënaqësisë ndaj BE-së, nga problemet e bashkëshoqëruara me globalizimin dhe emigracionin.
Emmanuel Macron sugjerohet të jetë presidenti i ardhshëm, me anketimet që e nxjerrin atë me shumë pikë para ekstremistes antipatike, posaçërisht pas debatit televiziv të mesjavës, të fituar qartësisht nga i pari. /tesheshi.com/
