Arkivoli i ish-kryeministri Bajram Rexhepi tashmë ka arritur në Kuvendin e Kosovës ku edhe kanë filluar homazhet. Pas tyre, pritet edhe Mbledhja Komemorative në Teatrin Kombëtar, në Prishtinë.
Më pas trupi i pajetë do niset në shtëpinë e tij te familjarët dhe më tej do mbahet edhe një mbledhje komemorative nga Komuna e Mitrovicës.
Varrimi i Rexhepit do bëhet në ora 16:30 në varrezat e dëshmorëve në fshatin Shipol të Mitrovicës.
Ndërkohë, Presidenti Hashim Thaçi ka shpallur sot ditë zie në Kosovë, në nderim të ish-kryeministrit, që ndërroi jetë dje në Turqi pas një sëmundje të rëndë.
“Në shenjë respekti shtetëror dhe qytetar, dita e martë, 22 gusht 2017, shpallet ditë zie shtetërore në Republikën e Kosovës, pas vdekjes të Dr. Bajram Rexhepi, veteran i UÇK –së, ish kryetar i Komunës së Mitrovicës, ish kryeministër i Kosovës, ish ministër i Punëve të Brendshme, ish deputet i Republikës së Kosovës dhe kirurg.”, thuhet ndër tjerash në vendimin e presidentit Thaçi.
Me vendim të Presidentit, flamujt shtetëror ngrihen në gjysmështizë në të gjitha objektet shtetërore të Republikës së Kosovës, brenda dhe jashtë vendit. /tesheshi.com/
