Lulzim Basha i ka dërguar Edi Ramës sinjale që mund të negociojë për të gjetur një zgjidhje përpara se kryeministri të vendosë të ndërpresë totalisht komunikimet.
Burime qeveritare bëjnë të ditur se mbrëmë dhe sot në mëngjes kanë mbërritur emisarë të Lulzim Bashës të gatshëm për të negociuar, por nuk dihen detajet.
Partia Demokratike ka vetëm sot afat për t’u regjistruar në zgjedhje, pasi nesër zyrtarisht do të nisë rrugën e kolapsit. Ditën e premte, Edi Rama bëri një lëvizje surprizë, duke tërhequr kandidatin e PS-së në Kavajë, dhe i prishi planet Bashës. Por vendimi i Ramës ishte lëshimi i fundit që i bëri Bashës, duke i dhënë dhe dy ditë afat që të mund të futet në zgjedhje.
KQZ-ja do të mblidhet sot në orën 10 dhe do të miratojë listën përfundimtare të kandidatëve. Nëse PD-ja vendos që të dërgojë emrat e saj, atëherë do ketë shansin të hyjë në zgjedhje, pasi në të kundërt, nesër nuk do e ketë këtë mundësi. Edhe pse sot është e diel, KQZ-ja ka vendosur të mblidhet, pasi ky është afati i fundit për miratimin e listave, ndërsa nesër emrat do i shkojnë kompanisë së kontraktuar, e cila do nisë printimin e fletëve të votimit.
Pra, tërheqja në Kavajë ishte lëshimi i fundit që Rama i bëri Bashës, dhe i dha një tjetër shans të futej në zgjedhje, por që për PD-në nuk u interpretua kështu, pasi e cilësuan si fitore dhe u rriti entuziazmin. Shpresat e demokratëve ishin te shtyrja e zgjedhjeve, por të premten dhe dje u lëshuan dy mesazhe shumë të forta nga SHBA-ja dhe BE-ja, të cilat e bënë të qartë se 18 qershori nuk shtyhet. Kjo do të thotë që shpresat e PD-së u venitën, dhe dje demokratët e kuptuan se vetëm e diela është afati i fundit për t’u regjistruar në zgjedhje. Për këtë arsye, dje kanë nisur negociatat mes PS-së dhe PD-së mbi mundësinë e arritjes së një marrëveshjeje.
Ka qenë Basha ai i cili ka kërkuar që të ketë një tjetër diskutim mes palëve, pse jo dhe një takim me kryeministrin, ku të vendosen përfundimisht pikat mbi “i”.
Negociatori i Ramës e ka bërë të qartë se afati i fundit që PD-ja të futet në zgjedhje është e diela; pra, që nuk do ketë shtyrje zgjedhjesh dhe asnjë lloj lëshimi tjetër në qeveri, apo aq më keq qeveri teknike.
Ndërsa të dërguarit e Bashës këmbëngulin te mundësia e një marrëveshjeje të re, ku kryesorja është që të shtyhen zgjedhjet. Dje ka pasur diskutime intensive, por nuk u arrit asnjë konkluzion.
Siç mësohet, edhe sot do vijojnë takimet me shpresën se deri pasdite palët do gjejnë emëruesin e përbashkët, por që ka shumë pak shanse.
Javën që vjen, PD-ja ka deklaruar nisjen e protestave masive, por një numër i madh zyrtarësh të saj kanë shpallur kundërshtimin e bojkotit dhe pritet të marrin hapat e tyre.
Në orën 18:00, Basha ka thirrur mbledhjen e grupit parlamentar, ku pritet të marrë dhe vendimin final për zgjedhjet.
Plani i Selamit dhe Bregut është që pas zgjedhjeve të kërkojnë largimin e Lulzim Bashës nga drejtimi i PD-së.
Kjo pasi, sipas kalendarit politik, PD-ja në korrik do të mbajë zgjedhjet e saj për kreun dhe strukturat drejtuese. /tesheshi.com/
