Pas polemikave të shumta mes partisë maqedonase në pushtet, VMRO-së kundër fondacionit të miliarderit amerikan George Soros, është kërkuar që të bëhen të ditur të ardhurat e drejtuesve të këtij institucioni në Maqedoni.
Sipas Drejtorisë për të hyra publike, është bërë e ditur se Fani Karanfilovska, presidentja e fondacionit “Soros”, për 2014 ka pranuar financime bruto me vlerë 2.030,118 denarë. Kjo shumë ka qenë e paraparë për pagesën e rrogave dhe përfitimeve shtesë të punonjësve të fondacionit, njofton portali maqedonas “Kurir”. Në bazë të kësaj shume vetë Karanfilovska ka pasur rrogë prej 169.000 denarë ose rreth 2750 euro në muaj.
Ndërsa në vitin 2015 të ardhurat e fondacionit “Soros” janë rritur ndjeshëm për rreth 25 përqind në 2.503,145 denarë, ndërsa rroga mujore e presidentes së fondacionit ka arritur në 3400 euro në muaj ose për dy vjet të ardhura prej 4.533,263 denarë ose rreth 73.000 euro. Kjo është e barabartë me dhjetë rroga mesatare të një qytetari në Maqedoni, që Fani e ka marrë për një muaj.
Po ashtu, edhe anëtari kryesor i “Soros” në Maqedoni, Vladimir Milcin në 2014 ka marrë rrogë 3600 euro.
Përndryshe pjesë e të ardhurave të majme nga fondacioni “Soros” është edhe bashkëshortja e Gjorgji Lazarevskit, shef i Drejtorisë për Siguri dhe Kundërzbulim, Spomenka Lazarevska. Në 2014 dhe 2015, ajo ka marrë 2.468,578 dhe 2.604,900 denarë financime, respektivisht rreth 82.495 euro për dy vite së bashku.
Kujtojmë që Fondacioni “Soros” akuzohet nga partia maqedonase, VMRO-DPMNE, se përmes financimeve të errëta mundohet të kontrollojë pushtetin në Maqedoni. M. Krasniqi – /tesheshi.com/
