Këshilli i Bashkimit Evropian emëroi Luigi Soreca si Përfaqësues Special të Bashkimit Evropian për Bosnjë dhe Hercegovinën.
Që nga pranvera e vitit 2022, Soreca ka qenë i Dërguari Special i BE-së për dimensionin e jashtëm të migracionit, që operon në Shërbimin Evropian të Veprimit të Jashtëm në Bruksel. Më parë ka qenë kreu i Delegacionit të BE-së në Shqipëri nga viti 2018 deri në vitin 2022.
Siç u njoftua nga Këshilli i BE-së, mandati i tij do të jetë sigurimi i progresit të vazhdueshëm në Procesin e Stabilizim Asociimit, me synimin e një Bosnjeje të qëndrueshme, paqësore, multietnike dhe të bashkuar, e cila do të bashkëpunojë paqësisht me fqinjët e saj gjatë rrugës për anëtarësimin në BE. Ai gjithashtu mbështet zbatimin e Marrëveshjes Kornizë të Përgjithshme për Paqe në Bosnje.
Marrja e detyrës
Soreca foli pas vendimit të Këshillit të BE-së dhe tha se do të marrë detyrën në fillim të shtatorit të këtij viti.
“Krenar që Këshilli i BE-së më emëroi si përfaqësues special të BE-së për Bosnje dhe Hercegovinën. Mezi pres të marr detyrën në fillim të shtatorit 2024 në një moment kyç në rrugën drejt integrimit të Bosnjë-Hercegovinës në BE, pas vendimit të Këshillit Evropian në mars 2024 për hapjen e negociatave të anëtarësimit”, shkroi Soreca në platformën X.
Soreca do të zëvendësojë ish-përfaqësuesin special të BE-së, Johann Sattler, mandati i të cilit përfundon më 31 gusht 2024, pas pesë vitesh.
Soreca u emërua për një mandat dy vjeçar. /tesheshi.com/
