Mançester Siti dhe Barcelona do të takohen edhe një herë dy javë pasi anglezët humbën 4-0 në “Camp Nou”.
Përballja është në kuadër të fazës në grupe të Champions League-s. Për Mançester Sitin, kjo është një ndeshje kritike, pasi mund të humbasë vendin e dytë në grupin C nëse nuk merr një rezultat pozitiv. Përndryshe, është dhe një takim tjetër i Guardiola-s me të shkuarën e tij.
“Nuk është një finale për ta, është një finale për ne,” ka deklaruar tekniku i Mançester Sitit.
“Duhet të përqendrohemi për 90 minuta, duke e ditur se ata do të provokojnë gabime për shkak të cilësisë që kanë.”
“Do ta provojmë. Kurrë nuk hyj në një ndeshje duke menduar se nuk mund të fitojmë, por duhet të luajmë në mënyrë thuajse të përsosur,” ka shpjeguar Guardiola në një konferencë shtypi.
Veç këtij takimi, do të luhen sonte dhe shtatë sfida të tjera po për Champions League-n, duke filluar me Beshiktash – Napoli, e duke vijuar me Ludogorec – Arsenal, Bazel – PSG, Benfika – Dinamo e Kievit, Borusia e Mynshegladbahut – Sëlltik, Atletiko e Madridit – Rostov, PSV Eindhoven – Bajern i Mynihut. /tesheshi.com/
