Në “Anfield” do të ketë një përplasje fantastike sonte në 21:00. Liverpuli do të presë Çelsin, në një prej sfidave më emocionuese të kampionatit anglez.
Luhet java e 23-të në Premier League, dhe londinezët e Çelsit kryesojnë renditjen me 55 pikë. Në ditë jo të mira, Liverpuli është goxha poshtë tyre: në vend të katërt, me dhjetë pikë më pak.
Situata ka ndryshuar dramatikisht muajt e fundit. Çelsi do të kalonte fillimisht një krizë, për të nisur më pas një seri të gjatë rezultatesh pozitive që e kanë sjellë atë në krye. E kundërta me Liverpulin, që pas një shpërthimi në lojë e rezultat ka ardhur duke u fikur, veçanërisht gjatë këtij muaji, ku ka fituar vetëm një takim në FA Cup.
Pozicionimi favorizon Çelsin, por kur bëhet fjalë për Liverpulin, sonte mund të presësh gjithçka në “Anfield”.
Jurgen Klopp, tekniku gjerman i Liverpulit, kërkon vetëm ruajtje të një fryme pozitive.
“Nuk ka arsye për asgjë tjetër. Në plan afatshkurtër, kundër Çelsit, kjo do të ndihmonte shumë.”
“Ne kemi nevojë për besim, për vetëbesim, për të qenë besimplotë sa të jetë e mundur,” shton Klopp, që e ka provuar te Borusia e Dortmundit se ç’do të thotë të humbasë besimi në skuadër.
Në anën tjetër, Antonio Conte, trajneri i Çelsit, nxjerr veç fjalë të mira për Liverpulin.
“Liverpuli e nisi shumë mirë sezonin, duke luajtur futboll tërheqës, dhe mendoj se kjo është rruga e drejtë.”
Sido që të jetë forma aktuale e dy kundërshtarëve të kësaj mbrëmjeje, përplasja premton gjithçka, nga emocionet te golat. /tesheshi.com/
