Ballafaqimi i mbrëmjes së kësaj të shtune mes dy gjigandëve të futbollit spanjoll është më i shumëprituri. Barcelona dhe Reali i Madridit takohen në takimin e tyre të dytë në La Liga, ndërsa të parin katalanasit e kanë fituar në 0-4 në “Santiago Bernabeu” më 21 nëntor të vitit të shkuar.
Barcelona e kryeson kampionatin spanjoll me 76 pikë dhe nuk humb në të prej 23 javësh. Reali i Madridit ka dhjetë pikë më pak, e gjendet në vend të tretë. Madrilenët kanë fituar katër ndeshje të njëpasnjëshme në La Liga, duke përfshirë atë me rezultat tenistik, 7-1, ndaj Selta Vigos.
Treshja e frikshme sulmuese e Barcelonës do të jetë në fushë. Nga 86 golat e Barcelonës në këtë kampionat, 69 janë shënuar prej tyre. Suarez ka shënuar 26 gola në tridhjetë javë të kampionatit, Messi ka shënuar 22, e Nejmar ka realizuar një më pak.
Lionel Messi do të kërkojë të shënojë sonte golin e tij të 500-të në karrierë. Me 449 gola të shënuar për Barcelonën, e me 50 me përfaqësuesen argjentinase, Messi ka rastin ta rrumbullakosë sonte shifrën.
Te Barcelona do të mungojnë për arsye dëmtimi Jeremy Mathieu dhe Adriano.
Të ngjashme janë shifrat për treshen sulmuese te Reali. Ronaldo, Benzema e Bejl kanë firmën e tyre në 63 prej 87 golave të ekipit në kampionat. Kristiano Ronaldo është golashënuesi më i mirë i kampionatit spanjoll, me 28 gola. Benzema ka shënuar 20, e Bejl 15 gola. Kjo treshe nuk e ka fituar asnjëherë El Clasico-n duke luajtur së bashku.
Raphael Varane është i dëmtuar, prandaj nuk do të jetë as në stol. Për Realin do të mungojnë dhe Kovaçiç e Arbeloa, të lënë jashtë skuadre.
Formacionet e mundshme janë këto:
Barcelona: Bravo, Serxhio Roberto, Pike, Maskerano, Jordi Alba, Buskets, Rakitiç, Iniesta, Nejmar, Suarez, Messi
Reali i Madridit: Navas, Danilo, Ramos, Pepe, Karvahal, Kasemiro, Kros, Modriç, Bejl, Ronaldo, Benzema
Ndeshja do të nisë në 20:30, e do të drejtohet nga Alehandro Hernandez.
Në stadium do të ketë një koreografi të veçantë në nderim të Johan Krujfit. /tesheshi.com/
