Më shumë se gjysma e izraelitëve kanë marrë anën e një ushtari që akuzohet se qëlloi për vdekje një palestinez të plagosur rëndë, i cili ishte i paaftë për t’u mbrojtur. Incidenti i ndodhur javën e kaluar në Hebron, është bërë pyetja e një sondazhi të zhvilluar nga një stacion televiziv izraelit. Ushtari po hetohet nga policia ushtarake izraelite me dyshimin për vrasje.
Ushtari doli në një seancë dëgjimore për vdekjen e 21-vjeçarit Abed Fatah al-Sharif, të enjten e kaluar. Në këtë seancë, prokuroria i deklaroi trupit gjykues se kishte shkëputje në rrëfimin e ushtarit për zhvillimin e ngjarjes, duke shtuar se i akuzuari, – mjek ushtarak- kishte qëlluar të plagosurin në kokë pa qenë e nevojshme.
Goditja mbi Sharif, 11 minuta pasi ai dyshohet se kishte marrë pjesë në një sulm ku u plagos një ushtar izraelit, është shndërruar në një debat të hidhur politik, duke shkaktuar ndarje në kabinetin e krahut të djathtë e duke frymëzuar demostrata në disa qytete izraelite.
Ushtari – që nuk është identifikuar zyrtarisht – ka tërhequr në të njëjtën kohë mbështetjen e medias sociale izraelite me më shumë se 13 mijë njerëz që janë bashkuar në faqet e hapura në Facebook dhe me 50 mijë të tjerë që kanë nënshkruar peticionin në mbështetje të veprimeve të tij.
Ndjesia mes publikut izraelit, sidoqoftë, është në kontrast të thellë me atë në Bregun Perëndimor, ku liderët palestinezë kërkuan që OKB të hapë një hetim mbi forcat izraelite për “ekzekutime joligjore” pas incidentit që ka bërë edhe xhiron e botës në internet.
Sekretari i Përgjithshëm i Organizatës për Çlirimin e Palestinës, Saeb Erekat shtoi se këto ekzekutime nuk janë ngjarje të izoluara, dhe se Izraeli duhet të mbahet përgjegjës për kryerjen e ketyre krimeve.
Rritja e mbështetjes nga izraelitët për ushtarin në fjalë vjen ndërsa ka të reja rreth incidentit, ku përfshihen raportime se ushtari është përgëzuar nga një aktivist i krahut të djathtë për vendbanimet.
Sipas sondazhit të kryer nga televizioni izraelit, Channel 2, 57 për qind e izraelitëve kundërshtojnë arrestimin e ushtarit, ndërsa 42 për qind e përshkruajnë veprimin e tij si “të përgjegjshëm”. Vetëm 5 për qind të atyre që janë pyetur në sondazh thanë se e shohin goditjen e të plagosurit si vrasje.
Ndërsa, goditja e të plagosurit është dënuar nga grupet e të drejtave të njeriut – dhe nga një zyrtar i lartë i OKB-së, si “ekzekutim i dukshëm i jashtëligjshëm”. Çështja, gjithashtu, ka ekspozuar vijën e ethshme të fajësimeve mes shoqërisë izraelite, pasi një numër politikanësh të lartë, përfshirë ministrin e Mbrojtjes, Moshe Yaalon, janë kritikuar ashpër për procedimin ligjor ndaj një ushtari.
Dy figurat më kryesore që janë dhënë mbështetje të zëshme për ushtarin dhe familjen e tij kanë qenë ministri i Arsimit, nga e djathta ekstreme, Naftali Bennett, partia e të cilit “Shtëpia hebreje” ka organizuar edhe një demostratë në qytetin Ramle si dhe ish-ministri i Jashtëm, një figurë luftëdashëse, Avigdor Lieberman.
Demostrata në Ramle po organizohet nga kryebashkiaku i qytetit dhe pason një demostratë të ngjashme të organizuar nga province e beit Shemesh natën e së hënës.
Po të hënën, shkëmbime të ashpra replikash ndodhën në lidhje me hetimin e ushtarit, një lëvizje e qeverisë kjo, edhe në parlamentin izraelit. Ministry Yaalon këmbënguli: “Ka nisur një hetim paraprak dhe të dhënat tregojnë për një ushtar që ka bërë një gabim, dhe jo për një hero”.
“Personi që vendosi të kryejë këtë hetim penal ishte komandanti i brigadës dhe kjo ndodhi, përpara se të dilte videoja. Që nga ajo kohë, është duke vazhduar hetimi i policisë ushtarake”.
Në përgjigje, Bennett akuzoi Yaalon për “baltosje” të ushtarit dhe pranoi haptaz se kishte telefonuar disa herë familjen e ushtarit për të foruar ndihmë. “Papritur, nuk lejohemi të flasim me familjen e mrekullueshme të një ushtari të jashtëzakonshëm? A e kemi humbur drejtimin. Ne dërgojmë fëmijët tanë për të na mbrojtur”.
Hetimi ushtarak ka përcaktuar tashmë se ushtari në fjalë nuk ishte pjesë e grupit që u sulmua nga dy palestinezë me thika, një prej të cilëve ishte Sharifi i plagosur dhe se ushtari i akuzuar kishte mbërritur në vendin e ngjarjes pas incidentit.
Hetuesit gjithashtu, kanë mësuar nga një ushtar tjetër se i akuzuari kishte thënë se Sharif “meritonte të vdiste” pasi kishte qëlluar me thikë shokët e tyre, e kjo përpara se ai të mbushte armën dh eta qëllonte një herë në kokë.
Përgatiti: Juli Prifti – /tesheshi.com/
