Kompania amerikane e sondazheve, Pew raporton se opinioni për Rusinë po bëhet gjithnjë e më i pafavorshëm nëpër botë. Të parët për mendimin e tyre jopozitiv për rusët dhe Rusinë renditen polakët dhe jordanezët me 80 për qind, më tepër sesa vetë ukrainasit që janë në konflikt në krahinat lindore me 72 për qind.
Në Gjermani, Rusia shihet nga 70 për qind e njerëzve jo në mënyrë pozitive sikundër edhe në Francë. Ndërsa pak vendet ku rusët preferohen janë Kina, Vietnami dhe Gana ku pjesa më e madhe e pjesëmarrësve në sondazh thonë se kanë mendim pozitiv për Rusinë.
Brenda Rusisë, opinioni i qytetarëve njeh rritje masive në favor të shtetit të tyre, ndërsa opinionet për NATO-n, BE-në dhe Shtetet e Bashkuara janë shndërruar në mënyrë dramatike në sensin negativ që prej vitit 2011.
Në vitin 2015, vetëm 15 për qind e rusëve kanë një opinion të favorshëm për Amerikën, me një ulje drastike nga 56 për qind në vitin 2011.
Një e treta e rusëve kanë opinion të mirë për Gjermaninë, më pak se gjysma e atyre në vitin 2011. Rënie të tilla shihen në opinionet e rusëve edhe për BE dhe NATO-n.
E kundërta ndodh në skenën e brendshme ruse, ku Putin, në vitin e 11 si lider i Rusisë, njeh vetëm mbështetje si për politikat e brendshme ashtu edhe ato të jashtme.
Një pjesë e madhe e rusëve e shohin Perëndimin dhe NATO-n si kërcënim ushtarak për Rusinë. Nacionalizmi, sipas sondazhit, është në rritje të dukshme, shumë rusë mendojnë se pjesë të disa vendeve fqinje u përkasin atyre, ndërsa shumica mendojnë se shpërbërja e ish-Bashkimit Sovjetik nuk ishte mirë për Rusinë. /tesheshi.com/
