Një sondazh i kryer nga Arab News-i dhe nga YouGov, një hulumtuese britanike e opinionit publik, ka treguar se thuajse gjysma e popullsisë së Lindjes së Mesme dhe të Afrikës së Veriut nuk do të votonte as për Clinton-in e as për Trump-in në zgjedhjet presidenciale të 8 nëntorit në SHBA.
Sondazhi i kryer me 3.017 njerëz në 18 vende të Lindjes së Mesme dhe të Afrikës së Veriut thotë se 47 për qind e të anketuarve janë shprehur se nëse u jepej mundëria të votonin, ata do t’i shpërfillnin si Clinton-in dhe Trump-in.
Mes atyre që janë përgjigjur se do të votonin, 44 për qind kanë pohuar se do të zgjidhnin Clinton-in, e vetëm nëntë për qind do ta deklaronin votën e tyre në favor të Trump-it.
“Ka pak entuziazëm për njërin apo për tjetrin kandidat, por 78 për qind besojnë se Clinton-i do të ishte më mirë për botën arabe nëse zgjidhej presidente, përkundër 22 përqindëve për Trump-in,” bëri me dije drejtuesi i YouGov-it britanik, Stephan Shakespeare.
Ky sondazh tregoi se qëndrimi i Clinton-it mbi ndryshimin e klimës, mbi emigrantët në SHBA e mbi politikën amerikane në lidhje me Izraelin ka gjetur mbështetje midis banorëve të Lindjes së Mesme dhe të Afrikës Veriore.
Eshtë arritur në përfundimin se mungesa e mbështetjes për Trump-in ka të bëjë më tepër me personalitetin e tij, sesa me politikën, pasi qëndrimi i tij mbi kontrollin e kufijve dhe mbi abortin ka rezultuar të jetë i përkrahur.
Deklaratat e tij, posaçërisht ajo e propozimit të ndalimit të hyrjes së muslimanëve në SHBA, duket se kanë ndikuar gjerësisht në mënyrë negative në opinionin publik të botës arabe, aq sa shumë pak kanë thënë se do të votonin për të nëse do e kishin të mundur. /tesheshi.com/
