Një studim i fundit i Qendrës Kërkimore Pew ka treguar se 51 për qind e britanikëve kanë një mendim pozitiv për BE-në.
Gjithashtu, sipas sondazhit të bazuar në intervistat e 6.028 personave në gjashtë vende të BE-së, në Britani, Gjermani, Francë, Itali, Spanjë dhe Poloni, 61 për qind e njerëzve janë në favor të bashkësisë së 28 vendeve europiane. Krahasuar me dy vite më parë, kjo është një rritje prej nëntë pikësh.
Në sondazh u vu re dhe një hendek midis votuesve britanikë në moshë të re dhe atyre në moshë të vjetër. Kështu, një shumicë dërrmuese e të rinjve mes moshës 18 dhe 29 vjeç, diku te 69 për qind, e shohin BE-në në një dritë pozitive.
Qendra kërkimore ka arritur në përfundimin se pavarësisht ndikimit të partive euroskeptike, popullariteti i Bashkimit Europian po rritet përsëri, dy vite pasi arriti një pikë të ulët për shkak të krizës ekonomike.
Britanikët ishin të ndarë në vitin 2013 në qëndrimin ndaj BE-së, 46 për qind kërkonin largimin nga bashkësia europiane, e 46 për qind ishin në favor të qëndrimit në të. Dy vite më pas, më shumë se gjysma e tyre shprehen se dëshirojnë të qëndrojnë brenda BE-së.
Ky është një sinjal i mirë teksa kryeministri Cameron ka premtuar për mbajtjen e një referendumi në vitin 2017 mbi qëndrimin e vendit të tij në BE. Shifrat kanë treguar se entuziazmi i britanikëve për ta lënë BE-në ka rënë që me premtimin e dhënë nga Cameron-i për referendumin.
Kundërshtimi më i zëshëm në Britani ndaj qëndrimit në BE ka ardhur nga UKIP-i, Partia e Pavarësisë e udhëhequr nga Nigel Farage, që pretendon se anëtarësia në bllok ka patur kosto për britanikët në kontrollin e kufijve, duke lejuar mijëra emigrantë të hyjnë në vend. /tesheshi.com/
