Qytetarët e thjeshtë në shtetet europiane, përfshirë Francën, Belgjikën, Gjermaninë dhe Britaninë e mbivlerësojnë në një shkallë të madhe përqindjen e popullsisë muslimane në vendet e tyre si dhe ritmin me të cilën kjo popullsi po rritet. Fenomenin e distancës mjaft të gjerë që ekziston mes realitetit dhe perceptimit publik e ka konstatuar një sondazh i kryer nga Ipsos Mori.
Sondazhi që është zhvilluar në 40 vende në vitin 2016 gjeti se të anketuarit francezë ishin më shumë në ankth se gjithë të tjerët, duke mbivlerësuar shifrat e popullsisë muslimane aktuale dhe të projektuar në vendin e tyre. Duket se francezët kanë idenë se muslimanët jetojnë në Francë në shifra shumë më të mëdha sesa në të vërtetë.
Francezët e zakonshëm vlerësojnë se në vendin e tyre 31 për qind e popullsisë është muslimane –pothuajse një në tre banorë. Sipas institutit “Pew Research”, popullsia musliamane në Francë në fakt, ishte 7.5 për qind në vitin 2010 ose një në 13 persona.
Të anketuarit në Francë ishin gjithashtu, të përfshirë nga ankthi ndërsa u përgjigjën për rritjen e popullsisë muslimane në vendin e tyre deri në vitin 2020. Sipas parashikimit të tyre muslimanët do të përbënin 40 për qind të popullsisë së Francës për një periudhë kohore prej katër vjetësh, pothuajse pesë herë më shumë se projeksioni i “Pew Research”, për pak më shumë se 8 për qind.
Por keq-perceptime të tilla nuk vërehen vetëm tek francezët; italianët, gjermanët dhe belgët kanë vlerësime të ngjashme. Të gjithë të pyeturit në këto vende hamendësuan se më shumë se një e pesta e popullsisë ishte muslimane, ndërsa në realitet, shifra varion nga 3.7 për qind në Itali deri në 7 për qind në Belgjikë. Të treja vendet mbivlerësojnë në mënyrë të jashtëzakonshme edhe shkallën e rritjes së popullsisë muslimane deri në vitin 2020, dhe vendin që do të zërë ajo në shkallë kombëtare.
Të anketuarit në Britani e vendosin popullsinë aktuale muslimane në 15 për qind, tre herë më shumë se shifra reale e vitit 2010, ndërsa mbivlerësojnë së tepërmi rritjen e saj deri në vitin 2020 me një përqindje shumë më të madhe, 22 kundrejt 6 për qind që pritet të jetë kjo rritje.
Në Shtetet e Bashkuara, vlerësimi i opinionit për popullsinë muslimane që jeton aty llogaritet në një në gjashtë persona, ndërkohë që “Pew” e vendos shifrën reale në një në 100 persona, dhe projektimi për të ardhmen është edhe më pak realist.
Të anketuarit australianë vlerësojnë se 12.5 për qind e popullsisë së tyre janë muslimanë, ndërsa shifra e vërtetë është vetëm 2.4 për qind. Projeksioni për të ardhmen, sipas të anketuarve, ishte 21 për qind, shumë më tepër se projeksioni real në shifrën e 3 për qind.
Sondazhi eksploroi gjithashtu, sesa mirë njerëzit ishin në gjendje të parashikonin qëndrimin kombëtar ndaj çështjeve si aborti, homoseksualiteti dhe seksi përpara martesës, duke pyetur qytetarët sesa për qind të popullsisë konsideronin të ishin të papranueshëm moralisht.
Në seksione të tjera, sondazhi pyeti njerëzit për përqindjen e atyre që e konsideronin veten të lumtur. Në secilin vend, qytetarët e nënvlerësuan raportimin për lumturinë.
Përgatiti: Juli Prifti – /tesheshi.com/
