Në muajin shkurt dhe mars, strukturat e Partisë Socialiste në të gjithë vendin kanë mundur të zhvillojnë një sondazh për zgjedhjet e 18 qershorit që e nxjerrin atë në ngritje me 4 mandate krahasuar me zgjedhjet e 2013-ës…
Numri magjik i 71 votave për të bërë qeverinë i mban peng partitë e mëdha në vend dhe të varura nga aleanca me Lëvizjen Socialiste për Integrim, e cila ka treguar të paktën në dy zgjedhjet e fundit që është king-maker (mbret-bërës). Por Partia Socialiste po krijon brenda vetes bindjen se mund të jetë forcë fituese dhe të arrijë të bëjë qeverinë e re edhe pa aleatin e saj mistrec e acarues. Kjo bindje e krijuar vetëm dy muaj para zgjedhjeve të 18 qershorit vjen pas një sondazhi që strukturat e PS-së kanë organizuar në të gjithë vendin. Nga llogaritë e votave në çdo qark e në çdo fshat, kjo parti beson se arrin të ngrihet në këto zgjedhje edhe 4 mandate më shumë se zgjedhjet e fundit të 2013-ës.
Burime nga selia rozë bëjnë të ditur për tesheshi.com se besohet se PS-ja po të futet e vetme në zgjedhje, pa LSI-në, merr 69 mandate deputetësh. Ky numër, i pamjaftueshëm për të bërë qeverinë, për PS-në është gjithsesi i konsiderueshëm pasi i lind e drejta për të krijuar qeverinë e re, ku me një aleancë me parti të vogla të cilat mund të kenë 1 ose 2 mandate do t’ia dilte të nxirrte jashtë loje LSI-në.
Numri magjik për krijimin e qeverisë
Socialistët besojnë se qeverisja Rama dhe reformat e ndërmarra këto 4 vite e kanë ngritur peshën e kësaj partie në elektorat. Përgjithësisht në dy palë zgjedhje parlamentare, PS-ja ka qenë në të njëjtin nivel votash me një rritje të lehtë nga viti 2009 në vitin 2013. Në zgjedhjet e 2009-ës PS fitoi 65 mandate, por nuk arriti dot të vinte në pushtet pasi PD me aleatët e saj kishte arritur të fitonte 69 mandate dhe me 4 mandatet e LSI-së arriti të bëjë qeverinë “Berisha 2”.
Po ashtu, në vitin 2013 PS-ja ka marrë si subjekt politik 65 mandate, por me LSI-në në krah ajo bëri qeverinë e re. LSI-ja pësoi një rritje të ndjeshme në këto zgjedhje duke e çuar numrin e deputetëve në 16 dhe duke u bërë përcaktuese për qeverisjen.
Duke besuar në krijimin e “numrit magjik” 69 mandate, ashtu siç bëri PD-ja në 2009-ën, kur këtë numër arriti të qëndronte në pushtet, edhe PS-ja beson se dhe pa LSI-në do të arrijë të fitojë një mandat të ri qeverisës duke qenë forcë e parë dhe vendimarrëse për krijimin e qeverisë së re. Tashmë në lojë futet dhe PDIU-ja e Shpëtim Idrizit, e cila është rritur si faktor elektoral, e aftë për t’u bërë një king-maker i ri pas LSI-së.
Burimet nga PS-ja bëjnë të ditur se sondazhet janë kryer nën mbikqyrjen Gramoz Ruçit, kryetari në hije i kësaj partie, njeriu që organizon strukturat e kësaj partie prej disa dekadash. Dhe kur Ruçi, i cili nuk para është shumë aktiv në media, del në takime me bazën dhe thotë se “ne jemi gati të futemi pa LSI-në në zgjedhje”, tregon se ai flet pasi i ka bërë llogaritë mirë.
Në këto kushte duket se aleanca dy partive të majta qëndron në këmbë për inerci dhe është Meta tani duke bërë llogaritë se sa humb apo fiton nga hyrja vetëm apo në koalicion me PD-në në zgjedhje. /tesheshi.com/
