Kancelarja gjermane Angela Merkel ka humbur pikë në popullaritetin që gëzon mes gjermanëve për herë të parë në katër vjetët e fundit, për shkak se qytetarët mendojnë se pritja e qindra mijë refugjatëve është “rraskapitëse”.
Përqindja e gjermanëve që janë të kënaqur me menaxhimin e detyrës së kancelares nga ana e Merkel ra me 9 për qind në 54 për qind në një sondazh të Infratest Dimap, niveli më i ulët që nga dhjetori i vitit 2011. Televizioni ARD që transmetoi sondazhin njoftoi gjithashtu se është rritur mbështetja për Horst Seehofer, kryeministrin e shtetit të Bavarisë që e ka cilësuar politikën e Merkel ndaj refugjatëve si një gabim. Ai është rritur në pëlqim me 11 për qind duke shkuar në 39 për qind.
Kjo rënie popullariteti reflekton sipas analistëve, rreziqet politike të vendimit të Merkel për të hapur Gjermaninë ndaj refugjatëvë që largohen prej Sirisë, e që ka nxitur edhe disa nga partnerët e Bashkimit Europian e partner qeverisës ta akuzojnë për inkurajim të fluksit të azilkërkuesve.
Pasi 38 për qind e gjermanëve të pyetur në sondazh e identifikuan veten “të frikësuar” nga kaq shumë refugjatë, në muajin shtator, numri i tyre tashmë ka shkuar në 51 për qind.
“Do të kërkojë kohë dhe shumë durim, nuk mund të funksionojë brenda natës”, u shpreh Merkel gjatë një fjalimi në qytetin Halle të enjten, duke folur për krizën e refugjatëve.
Gjermania pret 800 mijë azilkërkues deri në fund të vitit, por pjesa më e madhe e atyre që vijnë nga Ballkani do të kthehen sërish në shtëpi. Pothuajse 100 mijë njerëz në ditë mbërrinin në Gjermani në fund të shtatorit, e kjo nxiti qeverinë të shtrëngojë politikën e dhënies së azilit. /tesheshi.com/
