Presidenti turk, Rexhep Tajip Erdogan, është cilësuar si “Njeriu i vitit” për 2016-n në një sondazh të shërbimit në arabisht të rrjetit informativ Al Jazeera.
Rreth 130.000 persona kanë votuar në sondazhin e kryer në faqen e Facebook-ut të Al Jazeera-s, 40 për qind e votave të të cilëve kanë shkuar për kreun e shtetit turk, një prej figurave më të zëshme të politikës së sotme botërore.
Popullariteti i Erdoganit, posaçërisht në botën muslimane, është i jashtëzakonshëm. Një prej autoriteteve qeverisëse më spikatëse, çdo fjalë e Erdoganit sot përbën lajm jo vetëm brenda Turqisë, por dhe jashtë saj. Emri i tij është i lidhur pazgjidhshmërisht me Turqinë e sotme, me prosperitetin e saj, me sfidat rajonale e ato globale.
Pas presidentit turk, sondazhi ka renditur Umran Dakneshin, pesëvjeçarin sirian të fotografuar në gusht të vitit 2016 me fytyrën tërë pluhur e gjak pas një sulmi nga forcat e regjimit të Esadit. Për të voglin sirian shkuan 34 për qind e votave.
Inxhinieri i vrarë tunizian i aviacionit, Muhamed Zuari, ka pasuar i treti në sondazhin e Al Jazeera-s, me 17 për qind të votave të dhëna për të. /tesheshi.com/
