Një sondazh i kryer në ditët e para të janarit në Francë e sheh Manuel Valls-in si fituesin e zgjedhjeve paraprake të së majtës, që do të zhvillohen këtë muaj.
Manuel Valls, që e la detyrën e kryeministrit një muaj më parë për të kandiduar për zgjedhjet presidenciale, mbetet kandidati kryesor për t’i përfaqësuar socialistët në këto zgjedhje.
Sipas sondazhit të kryer nga Harris Interactive, Valls pritet të kryesojë me 43 për qind në raundin e parë të paraprakeve, të paraparë për më 22 janar. Pas tij parashikohet të renditet Arnaud Montebourg, ish-ministri i Ekonomisë, që sondazhi e nxjerr me 25 për qind të votave të fituara. I treti në këtë raund, me 22 për qind, do të jetë Benoit Hamon, tregon i njëjti sondazh.
Ngjashëm me sondazhet e kryera në dhjetor, edhe ky sondazh e tregon Valls-in fitues të balotazhit të 29 janarit me 55 apo 57 për qind të votave, teksa ai do të ketë për rival njëri nga dy emrat e mësipërm.
Megjithatë, sondazhet nuk e shohin ish-kryeministrin si në gjendje për të rivalizuar në zgjedhjet presidenciale si kandidat i së majtës. Ai parashikohet të eliminohet që në raundin e parë të zgjedhjeve presidenciale, më 23 prill. Në balotazhin e 7 majit sugjerohet se do të dalë fitues konservatori Francois Fillon, i cili do të ketë për kundërshtar Marine Le Pen-in, përfaqësuesen e së djathtës ekstreme. /tesheshi.com/
