Partia Syriza e kryeministrit grek në largim, Aleksis Cipras tashmë lufton me partinë konservatore Demokracia e Re për të fituar zgjedhjet e 20 Shtatorit. Kështu sugjerojnë sondazhet e fundit, sipas të cilave Syriza ka humbur avantazhin që ka pasur deri më tani.
Nëse Syriza nuk arrin të fitojë shumicën në parlament në këto zgjedhje, Cipras nuk mund të formojë qeveri e ky rol do të merret përsipër nga lideri i Demokracisë së re, Evangelos Meimarakis. Sidoqoftë, në mos lajm i mirë, për kreditorët një negociator konservator është mjaft i pranueshëm, pasi Demokracia e Re sikundër partia e Cipras mbështet paketën e reformave të kushtëzuar nga ndihma financiare.
Në një tubim elektoral, Cipras kërkoi mbështetje për partinë e tij, duke thënë se do të kërkojë lehtësim të borxhit për Greqinë dhe do të rikthejë të drejtën e punëtorëve për të kërkuar marrëveshje përfituese kolektive, një masë që kundërshtohet nga kreditorët.
Përballë rebelimit nga ish-anëtarë të partisë së tij të linjës së ashpër, Cipras ka humbur 30 deputetë në parlament, e kjo e detyroi atë të thërrasë zgjedhje të parakohshme.
Lideri i Demokracisë së re, Meimarakis tha se ai do ta ftonte Syrizan në koalicion nëse fiton shumicën në zgjedhje.
“Unë besoj tek konsensusi dhe bashkëpunimi”, tha ai gjatë një interviste me televizionin Bloomberg. “Ne kemi treguar përgjatë viteve se kur është në të mirën e vendit dhe ruajtjen e pozicionit në zonën euro, jemi të gatshëm të bashkëpunojmë”.
Greqia ra dakord për një paketë të tretë shpëtimi prej 86 miliardë eurosh, në këmbim të zbatimit të një pakete të plotë reformash ekonomike. Sapo kaloi furtuna që rrezikonte falimentimin e Greqisë, vendi hyri në stinën e krizës politike e cila pritet të marrë një zgjidhje me zgjedhjet e 20 Shtatorit. /tesheshi.com/
