Lëvizja Vetëvendosje ka publikuar një sondazh të ri të opinionit publik të realizuar në muajin mars, i cili e nxjerr këtë subjekt në vend të parë para PDK-së.
“Rezultate e nxjerrin Lëvizjen Vetëvendosje në vend të parë me 20.8%, duke lënë prapa PDK-në me 18,4% dhe LDK-në me 16.4%. Duke hequr ata që kanë refuzuar të përgjigjen se cilën parti do ta votonin, diferenca mes nesh dhe partive tjera thellohet, me ç’rast Lëvizja Vetëvendosje merr 26%, PDK 23%, kurse LDK vetëm 20.4%”,tha sekretari organizativ i VV-së, Dardan Molliqaj, i cili prezantoi këtë sondazh.
Ai më tej tha se nga ky sondazh është fakti që Lëvizja Vetëvendosje është partia e parë si zgjedhje e dytë nga votuesit potencial me 13.6%.
“Nga ky sondazh vërehet po ashtu se Lëvizja Vetëvendosje është subjekti që ruan më së shumti votën, dhe atë në përqindje prej 92.7%, si dhe nga lëvizjet e votuesve më së shumti votues vijnë nga dy partitë e koalicionit qeveritar, 9.1% nga LDK dhe 8.2% nga PDK. Ndërkaq, personat që nuk kanë votuar në zgjedhjet e 2014-së, ku hyjnë edhe votuesit e rinj, në zgjedhjet e ardhshme kanë deklaruar se do ta votonin Lëvizjen Vetëvendosje në përqindje prej 24.1%, që është shifër jashtëzakonisht e lartë krahasuar me gjitha subjektet tjera”, tha ai.
Molliqaj tha se gjendja në të cilën është katandisur vendi dhe zhvillimet e fundit politike po e bëjnë çdo herë e më të ditur se angazhimi dhe kritika e VV-së është në vijën e duhur, dhe rrjedhimisht, konfirmohet si subjekti politik i cili mund ta bëjë ndryshimin që i duhet Kosovës.
“Ne do të vazhdojmë angazhimin në terren, punën dhe organizimin për fuqizimin e organizatës, do të vazhdojmë komunikimin e rregullt me gjithë qytetarët, dhe besojmë se e gjithë kjo do ta mundësojë fitoren tonë në zgjedhjet e ardhshme”, tha ai.
“Koalicion me LDK-në pa Mustafën, jo me PDK-në”
Sekretari Molliqajka ka treguar se edhe me cilat parti VV është e hapur për koalicion.
“Vetëvendosje nuk ka vija të kuqe për LDK-në, por pa Isa Mustafën në krye të saj”, tha Molliqaj, derisa bëri të ditur se nuk bëjnë koalicion veç me PDK-në e Kadri Veselit.
Mbetet të shihet se cili do jetë reagimi i partive tjera pas publikimit të këtij sondazhi, e në veçanti LDK-së që i bëhet thirrje për koalicion paszgjedhor por pa Mustafën në krye të partisë. /tesheshi.com/
