Ndërsa Athina përgatiste planin e reformave për të mundësuar marrjen e një pakete të re ndihme nga kreditorët, ekspertë francezë shkuan në ndihmë të saj. Pas arritjes së marrëveshjes, parlamenti francez votoi me mazhorancë absolute pro paketës së dakordësuar në Bruksel.
Ekspertët, ndërkaq, vënë në dukje se kjo gatishmëri e Francës në ndihmë të Greqisë nuk vjen aq nga solidariteti europian, sesa nga interesat e brendshme. “Ka pak sfida që e kanë vënë në provë vitet e fundit aleancën e fortë gjermano-franceze. Aktualisht njëra prej tyre është çështja se si duhet të veprohet me Greqinë. Në një kohë kur Hollande donte të dërgonte ekspertë në Athinë për të përgatitur propozime të reja për kreditorët, Gjermania po përgatiste një plan për të anuluar, sikur edhe përkohësisht, anëtarësinë e Greqisë në eurozonë”, thonë ekspertët pwr Deutsche Welle-n.
Sipas tyre, unioni monetar është i përçarë dhe kjo reflekton interesat e vetë vendeve.
Duke lënë mënjanë interesat e solidaritetit partiak, në Francë qeverisin socialistët sikundër të majtët në Greqi, Parisi zyrtar ka edhe pikëvështrim të njëjtë për eurozonën.
Ekonomia franceze nuk po rritet më, papunësia është dy herë më e lartë se në Gjermani dhe Holland nuk guxon ende të bëjë reforma radikale, që janë të rëndësishme, sipas disa analistëve.
Ekspertë të tjerë janë të mendimit se Franca bën pjesë tek vendet që do t’i sjellin shqetësime Europës në të ardhmen. /tesheshi/
