Një protestë në solidaritet me Gaza-n e jo pro Hamasit, për të gjithë spekullantët e mundshëm mediatikë, u mbaj në Sheshin Skënderbej, organizuar nga Forumi Musliman Shqiptar.
Aty ishte dhe Hamza Aburaja, një palestinez që jeton në Shqipëri. Ai foli për median e Tiranës, më saktë për Report Tv, duke thënë se si është e vërteta e realitetit atje, për të gjithë ata që ndoshta akoma nuk e kanë të qartë se ç’ndodh.
“Është një ngjarje e rëndë për çdokënd. Gjithë njerëzit atje janë të afërm të mi. Unë jam nga Hebroni, Bregu Perëndimor. Kemi disa rezoluta në që në vitin ‘81 që kërkojnë dhe shtetin e Palestinës veç shtetit të Izraelit, por ne nuk na është plotësuar kjo e drejtë. Jemi pushtuar që nga viti ‘67 dhe deri sot jemi në okupim. Deri sot nuk është dhënë asgjë. Izraeli vazhdon të jetë pushtues”, argumentoi ai.
Ky palestinez në Shqipëri sqaroi dhe çështjen e Hamasit.
“Lëvizja e Hamasit është një rezultat i pushtimit i okupimit. Izraeli ka pushtuar tokat e Palestinës. Kërkojmë liri, pushtuesi të largohet. Duam të marrim pjesën atë që na është premtuar. Nëse ne themi se çfarë ka bërë Hamasi, ne duhet të shohim dhe se çfarë ka bërë Izraeli. 70% të vrarëve janë fëmijë, nuk janë Hamasi, janë popull i pafajshëm. Duhet të shohim me balancë. Jam kundër çdo luftë që prek civilët pasi edhe ne kemi pasur vuajte si popull”, tha Hamza Aburaja.
Ndërsa lidhur me faktin se pse Palestina s’e njeh ende Kosovën, ai dha këtë shpjegim:
“Kosova ngjan me çështjen e Palestinës. Jemi njësoj. Aty është një çështje e ndërlikuar politikisht. Mahmud Abaz nuk është shumë i vendosur pasi ka presione, nuk vendos dot, është gjysmë i burgosur edhe ai. Ne si palestinezë jemi pro Kosovës”, tha Hamza Aburaja, me banim afro 30 vjet në Tiranë. /tesheshi.com/
