Në se do të ishte, Sokoli do të kishte vepruar ndryshe… në se do të ishte Sokoli nuk do ta pranonte këtë…, në se do të ishte Sokoli do të përballej me Edi Ramën, me Ilir Metën me Saimir Tahirin me të gjithë… këto fjalë artikulohen shpesh nëpër bisedat e miqve të Sokol Olldashit në PD.
Sot mbushen dy vite që Sokol Olldashi humbi jetën në një aksident automobilistik në Krrabë. Ai u lagua nga jeta në moshë të re dhe në mesin e karrierës së tij politike. Mbahet mend si një ndër deputetet dhe ish-drejtuesit kryesorë të PD-së, si dhe ndër më luftarakët në opozitë dhe në pushtet.
E ka nisur karrierën e tij si gazetar dhe ka qënë koleg dhe mik me shumicën e gazetarëve. Në vitin 2001, Sokol Olldashi u largua nga media për t’u angazhuar në PD dhe u zgjodh deputet i saj. Për katër vitet në opozitë, Sokol Olldashi ishte një ndër deputetët më aktiv të së djathtës. Në zgjedhjet parlamentare të vitit 2005 Olldashi hyri në garë në Shijak, një ndër zonat më të vështira atje, ku rivali i majtë kishte përqëndruar shumë pushtet ekonomik, si një rrezik për deformimin e votës. Megjtihatë e fitoi garën duke rritur maksimalisht peshën e tij politike në PD.
Pas fitores së PD-së në zgjedhjet e 3 korrikut 2005, Sokol Olldashi u emërua ministër i Brendshëm në qeverinë Berisha. Në dy vite në këtë detyrë ai shënoi suksese të dukshme në luftën kundër krimit pasi u arrestuan dhe u asgjësuan disa banda kriminale.
Sokol Olldashi u thye në garën përballë Edi Ramës për bashkinë e Tiranës për t’u ringritur më pas si ministër i Transporteve në qeverinë Berisha. Dhe më shumë se kaq, ai mbeti një ndër politikanët më akti në betejën me opozitën e majtë të drejtuar nga Edi Rama.
Në korrik 2013, Sokol Olldashi, humbi me shumë dinjitet garën përballë Lulzim Bashës për postin e kryetarit të PD-së. Ai e mbështeti fushatë e tij në riaktivizimin e shtyllave kryesore të së djathtës, ish-pronarët, ish-të përndjekurit politik e biznesi.
Për dy muajt e tij të fundit në parlament, Sokol Olldashi mbajti fjalime të ashpra kundër mazhorancës Rama-Meta duke u përqëndruar kryesisht tek beteja me LSI-në, egzistenca e së cilës, për Olldashin ishte një e keq që i ka ndodhur Shqipërisë.
Se ku qëndron problemi i opozitës e dinë vetë krerët e saj, por të kthehemi te pyetjet e bashkëpunëtorëve të ngushtë të Sokol Olldashit: çdo të bëntë ai në këtë situate, ku siç thotë analisti Lutfi Dervishi: “qeveria ka rënë, por ka zënë përfundi opozitën?! Nuk e dimë, Sokoli ka dy vjet që është larguar dhe vendi që ka lënë bosh është bosh ende. Në rast se PD i humbet zgjedhjet e radhës, e në rast se Basha largohet, sot për sot opozita nuk ka një figurë me karizmën e duhur për të hyrë në garë për postin e kryetarit të PD. Ky është vendi bosh që la Olldashi në PD. /tesheshi.com/
