Promovimi/ Libri “Loja që ndryshoi Shqipërinë” me autor gazetarin Sokol Balla, botuar nga UET-Press. Pse e librit janë dhe disa foto të pabotuara më parë të Kombëtares…
E nisi karrierën si gazetar kulture në terren, dhe, pas 20 e kusur vitesh, Sokol Balla, tashmë dhe i thinjur pak para kohe, na dhuron një libër mbi sportin; specifikisht futbollin; akoma më specifikisht kombëtaren kuqezi e cila bëri historinë duke shkuar në një Europian. Në kushte të tjera do ishte një libër me autor Skifter Këlliçin.
Por Balla, i lidhur me politikën jo vetëm nga Top Story i tij por dhe nga librat që ka nxjerrë ne treg, e ka implikuar atë gjithsesi me përmbajtjen e librit, duke thënë se bilanci i sportistëve që janë sot në politikë është i madh: që nga kryetari i Parlamentit, Meta; kryeministri Rama: disa ministra, madhe dhe kryetari i opozitës, Lulzim Basha i cili dikur ka qenë volejbollist.
“Sporti ka qenë ambasadori më i mirë, jo vetëm i thjeshtë i politikës, por i një vendi, që nga kohët më të lashta të Olimpias greke deri tek diplomacia e ping-pongut që afroi Amerikën me Kinën, apo që pajtoi Argjentinën me Britaninë në vitet ’90. Natyrisht ka qenë dhe arsye shtesë për luftra, në ish-Jugosllavi, apo pretekst për njohje ndërkombëtare, siç është rasti i Kosovës. Kështu ka qenë dhe futbolli për vendin tonë. Ky libër flet për Shqipërinë, për ecurinë e saj e saj në këto dy dekada e gjysëm. Në futboll pasqyrohet shpirti i Shqipërisë në epoka të caktuara, i vuajtjes dhe varfërisë, i rilindjes dhe prosperitetit, atij fals të piramidave, por dhe atij real të pas viteve 2000, të krenarisë së humbur nga tranzicioni dhe asaj të rigjetur sërish ”- tha ndër të tjera Balla gjatë promovimit në UET.
70-vjetori i Kombëtares
“Ky libër botohet në 70-vjetorin e ndeshjes së parë ndërkombëtare të futbollit të kuqezinjve, në shenjë modeste mirënjohjeje dhe falënderimi për gjithë ata që kontribuuan në një vit historik, kur pjesëmarrja e Kombëtares në finalen e Kampionatit Europian na bëri të gjithëve të ndiheshim të barabartë, për dhjetë ditë, me të gjithë vendet e kontinentit”, shkruan në hyrje të librit autori.
Trajneri i Kombëtares Shqiptare, Giani de Biassi, ishte i ftuar nderi në promovimin e librit të Sokol Ballës me rastin e 70-vjetorit të Kombëtares. Duke folur për besimin e tij tek Kombëtarja, që nën drejtimin e tij ka njohur sukseset më të mëdha me kuaklifikimin në Europian 2016, de Biassi tha se është besimi tek ëndrra që e arriti këtë sukses.
“Duke krijuar një skuadër ne mund të jemi më të fuqishëm dhe mund të arrijmë më larg. Vështirësia është të vendosësh njerëzit bashkë, pasi shpeshherë vetëofrohen njerëz që ndërhyjnë rreth tyre pasi janë ziliqarë. Mendoj se gjëja kryesore është të shohim çfarë ofron finalja. Kërkuam të arrinim një objektiv të cilin askush më parë nuk e kishte arritur ta bënte. Ja dolëm mbanë dhe kjo besoj se vjen si shkak i forcës së grupit dhe një meritë e madhe shkon vetëm për djemtë, të cilët ndoqën ëndrrën e tyre”- tha ai. “Mendoj se Shqipëria ka nevojë për shembuj pozitiv, njerëz që shohin shumë para dhe mendojnë se në jetë objektivat mund të arrihen nëse secili prej nesh jep maksimumin. Mendoj se thelbësore është të besojmë fort, jo për ndonjë gjë të lartë, por të jemi ne nga poshtë që duhet të japim një kontribut të rëndësishëm për t’u rritur në ekonomi apo sport. Mendoj se asgjë nuk vjen rastësisht. Në jetë mund të ketë fat, por nuk duhet të mungojë vendosmëria për të arritur objektivat dhe të mundohemi ta bëjmë bashkë”- theksoi trajnieri italian. /tesheshi.com/
Më poshtë mund të shihni fotot e rralla që ka në brendësi të librit:
