Nga Bekim Laci
Muaji i Ramazanit mban fetarisht dhe epitetin “muaji i mëshirës”, e në këtë frymë organizohet në Shkup çdo muaj Ramazani dhe e ashtëquajtura ‘Sofra e Iftarit’, në Çarshi. Llogaritet të jenë rreth 120 deri në 150 iftare falas në ditë. Fillimisht është konceptuar si tryezë për personat të cilët kanë vështirësi ekonomike, por meqë gjendet në Çarshi, te “Sofra e Iftarit” përveç skamnorëve, mund të takosh dhe ata besimtarë të cilët për shkaqe të ndryshme iftari i ka zënë jashtë shtëpive të tyre.
Ekrem Mustafa është njëri nga organizatorët e kësaj lloj “sofre filantropike” me plot qëllim fisnik, teksa thotë për portalin ‘tesheshi.com’ se në fillim ka qenë e vështirë të thyehet barrier e dallimit klasor ose ekonomik mes njerëzve, ndaj dhe “Sofrën” e kanë shfrytëzuar kryesisht për persona në nevojë, por tani siç thotë, në tryezë ulen edhe njerëz tjerë dhe kalimtarë të rastit:
“Qëllimi fillestar ka qenë të sjellim njerëzit në Çarshi, ta ngjallim pak këtë vend në kohë të iftarit. Ndodh që të ulen edhe kalimtarë të rastit që nuk e dijnë se shtrohen iftare falas, por kur kuptojnë idenë, ka të tillë që kontribuojnë duke lënë para për ta financuar projektin”, rrëfen Ekremi, sipas të cilit barën kryesore rreth financimit e kanë disa tregtarë shkupjanë, dëshira e të cilëve ka qenë të mbeten anonimë.
Kjo sofër plot i bënë skamnorët të shijojnë iftaret njëjtë sikur ata që kanë mundësi ekonomike, por më të lumtur siç thonë bashkëbiseduesit, i bën fakti se dikush kujtohet edhe për ta, e kjo i bën me shpresë.
Ushqimi që mbetet nga iftaret u shpërndahet personave më në nevojë, ndërsa për gjellërat e gatuara me shije dhe menynë e larmishme përkujdeset Muzafer Kovaçi, i cili ka ndihmën e tre djemve të tij.
Portalit ‘tesheshi.com’ i tha se për shtatë ditë të javës përgadit shtatë menu të ndryshme, sepse siç tha, nuk dëshiron të lëndojë ndjenjat e nevojtarëve duke u ofruar ushqim të njëjtë:
“Jo që nuk kam interes, por realisht çmimi 2.5 euro për një iftar është tejet simbolik krahasuar me çmimet në restorantet tjera. Të gjitha gjellrat që përgaditen te ne janë me mish, ndërsa në ditën e shtatë bëjmë zgarë për agjëruesit”, rrëfen Muzafer Kovaçi.
Organizatori shprehet se nuk ka financat e nevojshme për 30 ditët e Ramazanit, prandaj apelon tek të gjithë njerëzit e vullnetit të mirë që të ndihmojnë, me qëllim që njerëzit në nevojë ekonomike, të kenë një vend e mundësi ku do të mund të ushqehen për Ramazan. Ky muaj vlen më së shumti dhe këtë: shpalosjen e humanitetit në të gjitha dimensionet.
/tesheshi.com/
