Jeta nuk ka ndalur ende, edhe pse i quajturi coronavirus ka shtangur botën dhe ka vënë në alarm njerëzinë.
Mes të tjerash, luhet tenis, madje i klasit të lartë, siç ishte finalja e kësaj të shtune për femra në Australian Open.
Një 21-vjeçare e ka fituar Grand Slam-in e parë të vitit me një paraqitje fantastike në finale, duke u bërë fituesja më e re që nga viti 2008, kur Sharapova triumfonte në Melburn në moshën 20 vjeç.
E lindur në Moskë në 1998-n, tenistja amerikane dhuroi bashkë me rivalen spanjolle një ndeshje të shkëlqyer, me një tenis të nivelit të jashtëzakonshëm.
Kenin përmbysi avantazhin e Muguruza-s, humbi setin e parë dhe fitoi dy të tjerët, për të mbajtur për herëtë parë në jetën e saj një trofe Grand Slam-i. Ajo u mbijetoi momenteve të vështira në setin e tretë, në revansh më pas me një lojë të shkëlqyer.
Ambicioze, ajo fitoi karshi përvojës së spanjolles, dy herë kampione Grand Slam-i, në French Open në 2016-n dhe në Wimbledon në vitin pasardhës, si e vetmja teniste që i ka mundur motrat Williams në finale të tilla.
Fituese me rezultatin 2-1, Kenin pritet të ngjitet të hënën në vend të shtatë në renditjen botërore të tenisteve.
“Këto ishin dy javët më të mira të jetës sime,” qenë fjalët e triumfueses së 2020-s në Australian Open. /tesheshi.com/
