Projekti i Hugo Chavez-it për ta bërë Venezuelën një model të së ashtuquajturit prej tij “socializëm të shekullit të 21-të” mori fund me sa duket dje, kur opozita u shpall fituese e zgjedhjeve të përgjithshme.
Koalicioni i opozitës i Unitetit Demokratik ka fituar ka fituar më së paku 99 vende për në asamblenë kombëtare, kurse partia socialiste në pushtet ka arritur të sigurojë vetëm 46 vende.
Rrugët e Karakasit u pushtuan nga njerëz që festonin pasi kryetari i Këshillit Kombëtar Elektoral shpalli rezultatet e pjesshme gjashtë orë pas mbylljes së kutive të votimit.
Presidenti i vendit, trashëgimtari i Hugo Chavez-it, e pranoi rezultatin zgjedhor me keqardhje, duke ndjerë lëkundjen e pushtetit të tij. Megjithatë, Nicolas Maduro refuzoi ta quante humbjen si një fund për “revolucionin bolivarian.” Në një fjalim të mbajtur vonë në mbrëmje, ai do të thoshte: “Ne kemi humbur sot një betejë, por tani fillon lufta për socializmin.”
Krejt ndryshe ishte atmosfera në kampin fitues, ku Jesus Torrealba, udhëheqësi i koalicionit opozitar, do të deklaronte se, “Venezuela deshi një ndryshim, dhe sot ky ndryshim ka filluar.”
Fitorja e djeshme e opozitës së qendrës së djathtë në Venezuelë pason një tjetër humbje të së majtës në Amerikën Latine, atë në Argjentinë, kur muajin e shkuar u zgjodh për president një biznesmen konservator. /tesheshi.com/
