PSD-ja, Partia Socialdemokrate, i ka fituar zgjedhjet parlamentare të së dielës në Rumani.
Autoritetet zgjedhore rumune, raporton Associated Press, kanë deklaruar se me 99 për qind të votave të numëruara, të majtët socialdemokratë kanë siguruar rreth 46 për qind të tyre.
E dyta, me 20 për qind, vjen Partia Nacional-Liberale (PNL) e qendrës së djathtë.
Parti e tretë në zgjedhje ka dalë Bashkimi Shpëtoni Rumaninë, një organizim i ri politik, që si kartë kryesore ka atë të antikorrupsionit, e që me 9.3 për qind garanton hyrjen në parlament.
Kryetari i socialdemokratëve, Liviu Dragnea, doli mbrëmë në një konferencë shtypi pas rezultateve të para.
“Nuk duhet të ketë asnjë dyshim se kush i ka fituar zgjedhjet,” duke deklaruar kësisoj fitoren.
Pjesëmarrja në zgjedhje ishte e ulët, vetëm 39.5 për qind, më tepër se dy për qind më pak se në zgjedhjet e katër viteve më parë. /tesheshi.com/
