S’ndalet “lufta” në SHBA, kësaj here në spital

Një sulmues i armatosur me pushkë dhe armë vrau katër persona në një qendër mjekësore në Tulsa në shtetin federal amerikan të Oklahomas dhe më pas, siç supozohet, kreu vetëvrasje, tha policia.

Zëvendës sherifi konfirmoi se katër persona u vranë në të shtënat e fundit masive në Shtetet e Bashkuara, dhe se edhe sulmuesi ishte i vdekur, me sa duket nga plagët që ai kishte shkaktuar vetes me armë zjarri, raportojnë agjencitë.

Kapiteni Richard Molenberg tha se policia ka marrë një njoftim se një burrë i armatosur me pushkë ka hyrë në katin e dytë të një prej godinave të Qendrës Klinike të Shën Françeskut dhe se ka pasur të shtëna.

“Kur policia mbërriti në vendngjarje, disa njerëz u qëlluan dhe dy ishin tashmë të vdekur në atë kohë”, tha Molenberg.

Ai shtoi se policia gjeti edhe një person që besohej se ishte sulmuesi “pasi kishte me vete një pushkë dhe një armë”.

Ende nuk dihet se në çfarë rrethanash ka vdekur sulmuesi.

Policia në përgjigje të incidenteve të tilla është vënë nën vëzhgimin e publikut pasi një sulmues i armatosur vrau 19 fëmijë dhe dy mësues në një shkollë në Teksas javën e kaluar, ndërsa policia priti para ndërtesës për gati një orë.

Departamenti Amerikan i Drejtësisë njoftoi javën e kaluar se do të rishqyrtojë mënyrën se si reagoi policia ndaj të shtënave në shkollën në qytetin Juvalde.

Autoritetet pranuan se nxënësit dhe mësuesit thirrën policinë disa herë sepse sulmuesi kishte hyrë tashmë në shkollë dhe në të njëjtën kohë, më shumë se 10 oficerë policie ishin në korridorin e shkollës duke “bërë sehir”. /tesheshi.com/