Presidenti slloven Borut Pahor tha të shtunën se një mënyrë për të parandaluar ndarjen në Ballkan është që i gjithë Ballkani të anëtarësohet në Bashkimin Evropian.
Kur është fjala për zgjerimin e BE-së, ai vuri në dukje se për një kohë ka pasur optimizëm, por se ka rënë, si dhe se ka më pak vullnet në Bruksel.
“Për shkak të luftës në Ukrainë, paqja dhe stabiliteti në Ballkan janë të brishta. Ne u përpoqëm t’ia shpjegojmë këtë edhe BE-së. Në vitin 2016 gjatë bisedimeve në Sarajevë kemi thënë se zgjerimi nuk është problem teknik, por gjeopolitik dhe duhet të jemi më fleksibël në Bruksel”, tha Pahor në Forumin 2BS në Budva.
“Shumë do të varet nga qëndrimi i Vuçiçit”
Ai shprehu shpresën se Brukseli do të ndërmarrë disa hapa dhe gjithashtu beson se nëse do të ketë një zgjerim të BE-së, të gjitha vendet e Ballkanit do të anëtarësohen pak a shumë në të njëjtën periudhë.
“Mendoj se është përgjegjësi e të gjithë neve në rajon që të bëjmë gjithçka për të siguruar që Ballkani të hyjë në BE si një rajon stabil. Mendoj se një nga pasojat e luftës në Ukrainë do të jetë një ndarje e re në Evropë që u zhduk me rënien e Murit të Berlinit. Një mënyrë për të parandaluar ndarjen në Ballkan është që i gjithë Ballkani të anëtarësohet në BE. Kjo varet në një masë të madhe nga mënyra se si Vuçiç dhe Serbia do ta rregullojnë situatën strategjike në të cilën ndodhen,” vuri në dukje Pahor. /tesheshi.com/
