Vetëm emigrantët që kanë në plan të kërkojnë azil në vend apo ata me nevoja të dukshme humanitare do të lejohen të hyjnë në Slloveni. Këto janë masat më të fundit të marrë nga autoritetet sllovene në përpjekje për ta mbyllur rrugën ballkanike të kalimit të refugjatëve.
Serbia do t’i përgjigjet kësaj lëvizjeje të Sllovenisë me mbylljen e kufijve me Maqedoninë e Bullgarinë për ata që nuk posedojnë dokumente të vlefshme.
Ministria e Brendshme e Serbisë lajmëroi të hënën se Sllovenia nuk do të lejonte kalimin e askujt që nuk kishte një vizë e pasaportë që nga mesnata e së martës. Një njoftim i dikasterit të mësipërm bënte me dije se Serbia do të zbatonte të njëjtat rregulla për të mos u kthyer në një pikë grumbullimi refugjatësh.
“Duke patur parasysh se regjimi i ri zbatohet nga një anëtar i Bashkimit Europian, Serbia nuk mund të bëhet një qendër mbledhjeje për refugjatët,” thuhet në njoftim.
Masat e tilla nënkuptojnë praktikisht një mbyllje të rrugës ballkanike, e se refugjatët e gjendur momentalisht në Greqi, pranë kufirit me Maqedoninë, do ta kenë të pamundur të çajnë më tutje, drejt Serbisë, Kracisë, Sllovenisë dhe Austrisë. /tesheshi.com/
