Ndërsa refugjatët kanë vërshuar drejt Sllovenisë, autoritetet e këtij vendi kanë vendosur të dislokojnë ushtrinë në kufijtë e vet. Me hapin e ndërmarrë kërkohet të mbrohet kufiri dhe të ndihmohet frenimi i valës së refugjatëve, pasi kapacitetet e Sllovenisë janë tejet të kufizuara.
Qeveria sllovene u ka apeluar gjithashtu për ndihmë vendeve europiane, “Sllovenia u bën thirrje publikisht shteteve anëtare të BE-së dhe institucioneve europiane të përfshihen aktivisht në marrjen e kësaj barre.”
Në njoftimin e sotëm të qeverisë shpjegohet se Sllovenia i ka “mundësitë e kufizuara të kontrollit të kufirit dhe të bërjes vend emigrantëve”.
Vetëm në mëngjesin e ditës së sotme kanë kaluar kufirin slloven 5.000 refugjatë, e dje kanë bërë të njëjtën gjë 8.000 prej tyre.
Sllovenia u bë rrugëkalimi i ri i refugjatëve pasi Hungaria mbylli mesnatën e së shtunës kufirin me Kroacinë. Pjesa më e madhe e refugjatëve kanë si synim të tyre përfundimtar Gjermaninë dhe Austrinë. /tesheshi.com/
