Sipas planit të Bashkimit Europian për të bërë një shpërndarje të 40.000 emigrantëve, përgjithësisht sirianë, që gjenden në Itali dhe Greqi, Sllovakia do të presë 200 prej tyre.
Por qeveria sllovake ka njoftuar se planifikon t’i pyesë të gjithë emigrantët për fenë e tyre me të arritur, e se nuk do të pranojë asnjë musliman.
Ivan Metik, një zëdhënës i ministrisë sllovake të Punëve të Brendshme, është shprehur mes të tjerash se, “Dëshirojmë ta ndihmojmë Europën me çështjen e emigrantëve. Ne mund të marrim 800 muslimanë, por nuk kemi asnjë xhami në Sllovaki, kështu që si mund të integrohen muslimanët nëse nuk u pëlqen këtu?”
Ai tha se muslimanët nuk do të pranohen, ngaqë ata nuk do të ndjehen në shtëpi. Metik nuk pranoi ta quante këtë vendim si diskriminues, por bëri të ditur se ai synonte të siguronte kohezionin e bashkësisë.
Zëdhënësja e Komisionit të BE-së, Annika Breithard, tha se nuk mund ta komentonte drejtpërdrejt deklaratën sllovake, por theksoi se shtetet e BE-së e kishin të ndaluar çdo formë diskriminimi.
Ndërkohë, një tjetër zëdhënës, ai i UNHCR-së për Europën Qendrore, Babar Baloch, ka thënë fjalën e tij, “Risistemimi është tejet i domosdoshëm për shumë refugjatë që janë në rrezik ekstrem midis grupeve më të pambrojtura të botës. Ne i inkurajojmë qeveritë të zgjedhin një qasje përfshirëse ndërsa i marrin në shqyrtim refugjatët për risistemim, dhe nuk duhet ta bazojnë përzgjedhjen e tyre në diskriminimin.”
Teksa kriza e refugjatëve në Europë sa vjen e bëhet më e rëndë me valën e ardhjes së tyre që nuk ka të ndalur, vendet e BE-së u pajtuan muajin e fundit për një shpërndarje të një numri të tyre në dy vitet e ardhshme. /tesheshi.com/
