Nga Bujar M. Hoxha
Në pikën e ulët ku gjendet qeverisja, me një varg qëndrimesh problematike në aspekt kombëtar dhe ndërkombëtar, me shtetarë në arrati dhe të tjerë pas hekurave për shpërdorim material të pushtetit, çdo opozitë do të kishte bërë hatanë politikisht dhe do të kishte siguruar mbështetje masive popullore.
Nuk është rasti aspak ky me kundërshtarët e pushtetit të sotëm (opozitë është goxha fjalë e madhe, e pamerituar për skuthërinë kolektive), që nuk kanë asgjë prej politikani.
Gangrena e këtij vendi në këto momente paqartësie dhe me tym lufte në botë është parapolitika e njerëzve që synojnë aktualisht pushtetin, një masë e paformë njerëzish vështirësisht të përkufizueshëm përtej cilësisë për potere dhe për të mos thënë asgjë të dobishme kur ka aq shumë për të folur.
Në vend që sot të vihet me shpatulla pas muri kryeministri për idenë e tij monstruoze të një vatikani bektashian, për tonet e tij më hebraike se hebraikët, për pritjen e një presidenti të padëshiruar në një pjesë të mirë të botës, thyhen e digjen karrige.
Në vend që të thirret një konsultë kombëtare për pozicione të diskutueshme shtetërore në nivel gjeopolitik, nxitet përplasje fizike.
Në vend që ikjet e njerëzve, plakja e popullsisë, rënia dramatike e lindjeve dhe përpjekja për shkatërrimin e familjes klasike, deformimet demografike me pasoja të pakthyeshme, të marrin përparësi si axhendë kombëtare diskutimi, fjalës ia zë vendi rrugaçëria.
Në vend që të flitet për çmimin e turpshëm të karburantit dhe korrupsionin të përhapur në çdo qelizë të jetës e të kthyer në filozofi të saj, eunukët e mendimit ripërsërisin veten si turmë e pamerituar për t’u ndjekur.
Asgjë nuk është rastësore, asgjë nuk ka lidhje me idealizmin. Si rëndom në këto tre dekada, pas kinse rebelimeve për “demokracinë e rrezikuar” janë skema të mirëmenduara për ta shmangur vëmendjen nga ajo që i intereson publikut.
Ngaqë janë qenie pa personalitet, pa shtyllë kurrizore dhe të kthyer në kukulla, janë të lehtë për t’u vënë në rresht në çdo lojë…
Më e pakta, ata nuk meritojnë vëmendje në këtë teatër të fëlliqur! /tesheshi.com/
