Ka qenë pozitive kjo e shtunë për dy skuadrat më të njohura të Madridit, Realin dhe Atletikon, që i kanë fituar ndeshjet e tyre në javën e 23-të të kampionatit spanjoll.
Fillimisht ka qenë Atletiko që ka fituar 1-4 në fushën e Sporting Gijonit. Ekipi i drejtuar nga Diego Simeone ngjan të ketë gjetur ritmin e munguar, në të tretën fitore radhazi.
Me pjesën e parë të mbyllur ashtu siç nisi, golat janë rezervuar për në 45-minutëshin e dytë. Carrasco ka tundur rrjetën i pari, me Sergio Alvarez-in që përgjigjet shpejt për vendasit, në minutën e 49-të.
I vjen radha Gameiro-s të shpërthejë, teksa francezi shënon tre gola brenda pesë minutave, nga e 80-ta në të 85-tën.
Fitorja e lë Atletikon në vend të katërt në renditje.
Reali pati për protagonistë dy emra të munguar më herët në fitoren 2-0 ndaj Espanjolit pak orë më pas.
Alvaro Morata e nisi lojën si pjesë e formacionit të parë, për shkak të mungesës së Benzema-së; një mundësi që e shfytëzoi më së miri, duke shënuar në minutën e 33-të.
Kur po afrohej çerekorëshi i fundit i lojës, Morata ia lë vendin uellsianit Bale, të rikthyer kështu pas tre muajsh.
I munguar që nga nëntori i i vitit të shkuar, Bale, ashtu si Morata, nuk e çon dëm aktivizimin. Në të 83-tën minutën i çon shifrat në 2-0 me golin e tij.
Me 52 pikë, Reali mbetet në kryesim të La Ligës, edhe pse ka dy ndeshje më pak se kundërshtarët. /tesheshi.com/
