Edhe një herë tjetër emri i Besnik Hasit nis të qarkullojë në mediat sportive turke. Ish-lojtari i kombëtares shqiptare, që tani drejton Anderlehtin në kampionatin belg, i është shtuar listës së trajnerëve të dëshiruar nga Trabzonspori për sezonin e ardhshëm.
Ndërsa Hami Mandërrallë (Hami Mandıralı), një ish-futbollist i Trabzonsporit, nuk do ta drejtojë më ekipin në nisje të sezonit tjetër, drejtuesit e klubit turk janë vënë në kërkim të një trajneri të ri.
Mircea Lucesku, Felix Magath, Fonseca, Nigel Pearson dhe Ersun Yanal janë mes emrave të trajnerëve të synuar, të cilëve u është shtuar dhe Besnik Hasi.
Njëra prej faqeve elektronike sportive turke, sporx.com, njofton se presidenti i klubit turk do të takohet në ditët e ardhshme me Besnik Hasin për të biseduar mbi mundësinë e afrimit të tij si trajner i Trabzonsporit.
Dikur një skuadër kampione, Trabzonspori po kalon një prej sezoneve më të vështira dhe më të dështuara. Vendi i 12-të në klasifikimin e Superligës turke nuk i përmbush aspak pritshmëritë e drejtuesve të klubit.
Javë më parë Besnik Hasi do të përmendej dhe mes kandidatëve për të marrë drejtimin e Gallatasarajit, që po ashtu ka bërë një paraqitje shumë të dobët në këtë sezon. /tesheshi.com/
