Vite të tëra pritje në marrje të lejes së ndërtimit e të sigurimit të financimeve kanë marrë fund. Tre vite pritje që prej prishjes së stadiumit të vjetër e ndërtimit të të riut kanë mbërritur në fundin e tyre. Nga “İnönü Stadium” te “Vodafone Arena”!
Një prej tre skuadrave më të mëdha, më të suksesshme e më të njohura turke, Beshiktashi, do të ketë tashmë një stadium të ri. Ia ka vlejtur bredhja me çanta në krah e futbollistëve sa nga një fushë në tjetrën për sezone me radhë. Një ambient i shkëlqyer sportiv i pret tanimë ata.
Beshiktashi do ta luajë ndeshjen e parë në stadiumin e ri të hënën, kur do të ndeshet me Bursasporin në
kuadër të Superligës turke. Për ceremoninë madhështore të hapjes janë thirrur një mori trajnerësh që kanë drejtuar në të shkuarën Beshiktashin: Gordon Milne, Mircea Lucesku, Vicente Del Bosque e Slaven Bilic. Mes lojtarëve të ftuar është i madhi Guti, ish-mesfushori i Realit të Madridit, i cili luajti për Beshiktashin në sezonin 2010-2011, e Pascal Nouma, francezi që për atdhe të dytë ka bërë Turqinë.
Stadiumi i ri gjendet në qendër të qytetit, pak metra larg Dollmabahçesë së famshme, me një pamje fantastike të Bosforit. 350 milionë lira turke, apo 100 milionë dollarë, u harxhuan për ndërtimin e Vodafone Arenës.
Kapaciteti mbajtës është për 43.000 spektatorë, e stadiumi siguron gjithçka të teknologjisës së lartë, përfshirë një numër të madh ekranesh e sinjal interneti.
Në të ka gjithashtu restorante, një muze ku përshkruhet historia e Beshiktashit, duke mos harruar dhe vende faljeje për tifozët. Mesxhidet brenda stadiumit janë diçka vërtet mbresëlënëse.
Stadiumi i ri i Beshiktashit i shtohet në Stamboll stadiumit të ri të Gallatasarajit, të ndërtuar pak vite më parë. Përpos kësaj, një numër i madh stadiumesh po ndërtohen në tërë vendin, ku spikasin të inauguruarit më herët, i Bursës dhe i Konjës. /tesheshi.com/
