Policia e Skocisë ka ndërmend që të lejojë futjen e hixhabit si pjesë të uniformës së policisë, me qëllim të nxitjes së myslimaneve që t’i bashkëngjiten forcave të sigurisë.
Autoriteti i policisë skoceze, në kuadër të strategjisë për diversitet, me futjen e hixhabit si pjesë të uniformës synon të dëshmojë diversitetin e komunitetit skocez.
“Policia e Skocisë është e përkushtuar që të punojë bashkë me komunitetet e nën-përfaqësuara me qëllim që t’i inkurajojë ata për të marrë në konsideratë karrierën e tyre si policë. Një pjesë e kësaj ka të bëjë edhe me heqjen e barrierave, me rastin e punësimit të stafit të ri”, thotë Peter Blair, kreu i menaxhimit të resurseve në Policinë e Skocisë.
Deri më tani, zyrtaret femra të cilat kanë dashur të veshin mbulesën, janë detyruar që të marrin miratimin nga menaxheri i tyre.
Në Skoci jetojnë 77 mijë muslimanë, që i bie të përfaqësojnë rreth 1,4 përqind të popullsisë atje; ndërsa në Britanine e Madhe jetojnë afro 3 milion muslimanë. /tesheshi.com/
