Qeveria skoceze e sheh ndalimin e rritjes së kulturave të modifikuara gjenetikisht si një hap drejt ruajtjes së “markës së gjelbër dhe të pastër” të vendit.
Synimin për ta ndaluar rritjen e kulturave qeveria e bëri të ditur sot, duke shtuar si argument provat e pakta se konsumatorët skocezë i duan prodhimet e tilla.
Ndërsa prodhimi i kulturave të modifikuara gjenetikisht është i përhapur gjerësisht në Amerikë dhe në Azi, për to ka ende diskutime në Europë. Grupet e të gjelbërve vënë në pikëpyetje faktin nëse ato janë të shëndetshme për njerëzit, si dhe shqetësohen për ndikimin mjedisor prej tyre, ndërsa prodhuesit shprehen se këto prodhime janë të sigurta.
Richard Lochhead, sekretari i kabinetit për Çështjet Rurale, Ushqimin dhe Mjedisin, në qeverinë skoceze, u shpreh mes të tjerash në një deklaratë se, “Skocia është e njohur në botë për mjedisin e bukur natyror, dhe ndalimi i rritjes së kulturave të modifikuara gjenetikisht do ta mbrojë dhe do t’i japë më peshë statusit tonë të gjelbër, të pastër.”
Ai theksoi më tej, “Nuk ka dëshmi të kërkesës domethënëse për produkte të modifikuara gjenetikisht nga konsumatori skocez, dhe jam i shqetësuar se lejimi i rritjes së kulturave të modifikuara gjenetikisht në Skoci do ta dëmtonte markën tonë të gjelbër dhe të pastër, duke luajtur kështu me të ardhmen e sektorit tonë të ushqimit dhe pijeve prej 14 miliardë paundësh.”
Por kjo lëvizje e qeverisë skoceze nuk është pritur mirë nga fermerët dhe specialistët e fushës.
Fermerët kanë shprehur shqetësimin se ky ndalim ka për ta dëmtuar aftësinë e tyre për të vazhduar së qeni konkurrues me konkurrentët europianë.
Ndërsa profesori i gjenetikës molekulare, Huw Jones, e përshkroi këtë si “një ditë të trishtuar për shkencën, dhe një ditë të trishtuar për Skocinë.” /tesheshi.com/
